সৰুপথাৰ/বৰপথাৰঃ গোলাঘাট জিলাৰ সৰুপথাৰ বিধানসভা সমষ্টিৰ অন্তৰ্গত পূব বৰপথাৰ গাঁও পঞ্চায়তৰ সভাপতিৰ বিৰুদ্ধে দুৰ্নীতিত লিপ্ত থকাৰ অভিযোগ উত্থাপন হৈছে৷ ব্যাপক দুৰ্নীতি সংঘটিত কৰি কেইবা লাখ টকা লুটি খোৱাৰ অভিযোগ উত্থাপন হৈ আহিছে৷ এই অভিযোগৰ পিছতে ৮জন ৱাৰ্ড সদস্যই আনাস্থা আনিছিল পঞ্চায়তৰ সভাপতিৰ বিৰুদ্ধে।

একাংশ ৱাৰ্ড সদস্যই সভাপতি আৰু সচিবে পঞ্চায়তখনৰ আৱণ্টিত ধন আত্মসাৎ কৰাৰ অভিযোগ উত্থাপন কৰাৰ পিছতে মুখ্যমন্ত্ৰীৰ তদন্ত ঘোষণা কৰা হয়। মুখ্যমন্ত্ৰী তদন্ত ঘোষণাৰ পিছতে পূব বৰপথাৰ গাঁও পঞ্চায়তৰ সভাপতি দেবানন্দ শইকীয়াই প্ৰতিক্ৰিয়া প্ৰকাশ কৰিছে৷ তেওঁৰ বিৰুদ্ধে উত্থাপিত অভিযোগ ভুৱা আৰু ভিত্তিহীন আখ্যা দি একাংশই তেওঁক পদৰ পৰা অপসাৰণ কৰিবলৈ অভিসন্ধি চলাইছে বুলি মত ব্যক্ত কৰিছিল। ওলোটাই চিবিআইৰ তদন্ত কৰি দোষীক উচিত শাস্তি দিবলৈ মুখ্যমন্ত্ৰীলৈ দাবী জনাই পঞ্চায়তৰ সভাপতি দেবানন্দ শইকীয়াই।

তাৰ মাজতে পূৱ বৰপথাৰ গাঁও পঞ্চায়তৰ অচলাৱস্থাৰ অন্ত পৰে। পঞ্চায়তখনৰ সভাপতি দেৱানন্দ শইকীয়াক অপসাৰণ কৰি সভাপতিৰ আসনত বহে পঞ্চায়তখনৰ উপ-সভানেত্ৰী গীতামণি পেগু ৰেগনে। গোলাঘাট জিলা পৰিষদৰ কাৰ্যবাহী বিষয়া অভিজিৎ বৰুৱাই প্ৰেৰণ কৰা জিজেদপিএ(স)৫২/২০১৬-১৭/অংশ/২/৪৭৬ নিৰ্দেশ পত্ৰ যোগে সভাপতি দেৱানন্দ শইকীয়াৰ পদৰ পৰা অপসাৰিত কৰি ৯নং ৱাৰ্ডৰ সদস্যা তথা উপ-সভানেত্ৰী গীতামণি পেগু ৰেগনক ভাৰপ্ৰাপ্ত সভানেত্ৰীৰ দায়িত্ব অৰ্পণ কৰে।

বুধবাৰে পঞ্চায়ত কাৰ্যালয়ত এখন সভা অনুষ্টিত কৰি আনুষ্ঠানিক ভাৱে গীতামণি পেগু ৰেগনে ভাৰপ্ৰাপ্ত দায়িত্বভাৰ গ্ৰহণ কৰে। উল্লেখ্য যে, যোৱা ২৩ জুনত উন্নয়ন খণ্ডৰ কাৰ্যালয় কক্ষত অনুষ্ঠিত এখন সভাত ১০গৰাকী ৱাৰ্ড সদস্যই পঞ্চায়ত সভাপতি দেৱানন্দ শইকীয়াৰ বিৰুদ্ধে অনাস্থা প্ৰস্তাৱ আনিছিল৷ ফলত সংখ্যাগৰিষ্ঠতা হেৰুওৱা সভাপতিগৰাকীয়ে পদবী হেৰুৱাব লগীয়া হয়৷ পঞ্চায়তখনত সভাপতি নথকাৰ বাবে অচলাৱস্থা বিৰাজ কৰিছিল৷ অৱশেষত ভাৰপ্ৰাপ্ত সভানেত্ৰী ৰূপে গীতামণিয়ে দায়িত্ব গ্ৰহণ কৰাত অচলাৱস্থা দূৰ হোৱাৰ কামনা কৰিছে ৰাইজে৷