গুৱাহাটীঃ পুনৰ কাৰ্যক্ষম হৈছে উত্তৰ গুৱাহাটী-গুৱাহাটীৰ মাজৰ ৰ’পৱে সেৱা৷ সোমবাৰে পুৱা ৯ বজাৰ পৰা ব্ৰহ্মপুত্ৰ ওপৰৰ ৰ’পৱে সেৱা কৰ্যক্ষম হোৱা বুলি জানিব পৰা গৈছে৷ কাৰিকৰী বিজুতিৰ অন্তত ৫ দিনৰ ভিতৰত মেৰামতি কৰে সমশ্লিষ্ট কৰ্তৃপক্ষই৷

সোমবাৰে পুৱাৰ ভাগত অভিযন্তা আৰু বিশেষ কাৰিকৰী দল এটাই পুনৰ কাৰ্যক্ষম কৰি তোলে ৰ’পৱেটো৷ আশা কৰা মতে, এতিয়াৰ পৰা ৰ’পৱেই সেৱা আগবঢ়াই যাব৷ এবাৰত ৩২গৰাকী যাত্ৰীয়ে আহ-যাহ কৰিব পৰা ৰ’পৱেট আহ-যাহৰ বাবদ ১০০ টকা আৰু এবাৰ পাৰ হলে ৬০ টকা ভৰিব লাগিব৷

২৫ আগষ্টৰ পুৱাৰে পৰা বন্ধ ৰখা হৈছিল ৰ’পৱে সেৱা৷ চিষ্টেম পেনেলৰ ইঞ্জিনৰ বিজুতি ঘটাত বিদ্যুতৰ যোগান ব্যাহত হৈ পৰাত সেৱা বন্ধ কৰা বুলি জানিব পৰা যায়৷ ২০০৯ চনত তদানীন্তন মুখ্যমন্ত্ৰী তৰুণ গগৈয়ে আধাৰশিলা স্থাপন কৰাৰ ৰ’পৱে সেৱা ১১ বছৰৰ মূৰকত ২৪ আগষ্ট আৰম্ভ হৈছিল৷ বিত্তমন্ত্ৰী ড০ হিমন্ত বিশ্ব শৰ্মা আৰু নগৰ উন্নয়ন মন্ত্ৰী সিদ্ধাৰ্থ ভট্টাচাৰ্যই ৰ’পৱে সেৱা মুকলি কৰিছিল।

৫৬ কোটি টকা ব্যয় সাপেক্ষে সাজু কৰা ৰ’পৱে ১৮২০ মিটাৰ দৈৰ্ঘ্যৰ নদীৰ ওপৰত থকা দেশৰ দীৰ্ঘতম ৰ’পৱে বুলিও চৰ্চা লাভ কৰিছে৷ এই ৰ’পৱে সেৱা আৰম্ভ হোৱাত গুৱাহাটী-উত্তৰ গুৱাহাটীৰ মাজত যোগাযোগ সহজ হৈ পৰিব বুলি একাংশ লোকে দাবী কৰিছে৷