ডিজিটেল ডেস্কঃ ক’ৰোনা সংকটৰ মাজতে ৰাজনৈতিক দলসমূহৰ ৰাজনৈতিক কুচ-কাৱাজ চলি আছে৷ শাসক-বিৰোধী সকলো দলে ক’ৰোনাকালত প্ৰভাৱ বিস্তাৰ কৰিবলৈ চেষ্টা কৰি থকা দেখা গৈছে৷ ক’ৰোনা সংকট কালত ৰাজহুৱা সভা অনুষ্ঠিত কৰাত বাধা আৰোপ কৰাৰ ফলত সামাজিক মাধ্যমত ভাৰ্চুৱেল ৰেলী যোগে শাসকীয় দলে ভোটাৰৰ সংস্পৰ্শত থাকিব বিচাৰিছে৷

কিয়নো দেশৰ দুখন বিশেষ ৰাজ্যত বিধানসভা নিৰ্বাচন অনুষ্ঠিত হ’ব৷ দুয়োখন ৰাজ্য শাসকীয় বিজেপি দলৰ বাবে গুৰুত্বপূৰ্ণ৷ এখন হৈছে বিহাৰ আৰু আনখন হৈছে পশ্চিমবংগ ৰাজ্য৷ বিহাৰত বিজেপিয়ে জেডিইউৰ সৈতে লগলাগি চৰকাৰ চলাই আছে যদও পশ্চিংবংগত আজিলৈ বিজেপিয়ে চৰকাৰ গঠন কৰিব পৰা নাই৷

কেন্দ্ৰৰ শাসক দল বিজেপিয়ে জেডিইউৰ সৈতে লগলাগি বিহাৰ দখল কৰাৰ লগতে পশ্চিমবংগ অকলে দখল কৰিব খোজে৷ তাৰ মাজতে আজি বিজেপিৰ প্ৰাক্তন সভাপতি তথা দেশৰ গৃহমন্ত্ৰী অমিত শ্বাহে পশ্চিমবংগৰ বাবে ভাৰ্চুৱেল ৰেলী সম্বোধন কৰে৷ ডিজিটেল ৰেলী সম্বোধন কৰি পশ্চিমবংগৰ মুখ্যমন্ত্ৰী মমতা বেনাৰ্জীক তীব্ৰ সমালোচনা কৰে শ্বাহে৷ মমতাক তীব্ৰ আক্ৰমণ কৰি কয় যে পশ্চিমবংগ দেশৰ একমাত্ৰ ৰাজ্য যত ৰাজনৈতিক হিংসাৰ ব্যৱসায় চলে৷ আমি লোকসভাত ৩০৩ খন আসনত জয়ী হৈছো৷ কিন্তু মোৰ বাবে এই ১৮ খন আসন গুৰুত্বপূৰ্ণ আছিল৷ যিকেইখন আসন আমি পশ্চমবংগত জয়ী হৈছো৷ যিদিনা ভাৰতীয় জনতা পাৰ্টীয়ে পশ্চিমবংগত চৰকাৰ গঠন কৰিব সিদিনাই ‘আয়ুস্মান ভাৰত’ যোজনা মুহূৰ্ততে কাৰ্যকৰী হ’ব৷ শ্বাহে আৰু কয় যে মই পশ্চিমবংগৰ জনতাক কব খোজে যে ২০১৪ চনত আৰু ২০১৯ চনত মোদীয়ে পুনৰ চৰকাৰ গঠন কৰিছে৷ মোদী চৰকাৰৰ দ্বিতীয় কাৰ্যকালৰ প্ৰথম বছৰৰ সমাপ্ত হ’ল৷ এই ৬ বছৰত ভাৰতবৰ্ষ বিভিন্ন দিশত আগুৱাই নিছে৷ ৬ বছৰত সমস্যা সমাধান কৰি থকা হৈছে৷