মানিকপুৰঃ উপ-সভানেত্ৰীৰ অশ্লীল ফটো তুলি ভাইৰেল কৰাৰ ভাবুকি দিয়া বঙাইগাঁও জিলাৰ কোকিলা গাঁও পঞ্চায়তৰ সভাপতি আব্দুছ ছাত্তাৰৰ বিৰুদ্ধে এইবাৰ ব্যাপক দুৰ্নীতি সংঘটিত কৰাৰ অভিযোগ উত্থাপন হৈছে৷ বঙাইগাঁও জিলাৰ সৃজনগ্ৰাম উন্নয়ন খণ্ডৰ অন্তৰ্গত ১নং কোকিলা গাঁও পঞ্চায়তৰ সভাপতি আব্দুছ ছাত্তাৰৰ বিৰুদ্ধে দৰিদ্ৰ সীমাৰেখাৰ তলৰ লোকৰ বাবে গৃহ আৱণ্টন দিয়াৰ নামত উৎকোচ লোৱাৰ আন এক অভিযোগ উত্থাপন হৈছে৷ বিভিন্ন দুৰ্নীতি, কেলেংকাৰী, গুণ্ডাৰাজত জৰিত থকাৰ অভিযোগ থকা সভাপতিজনে চৰকাৰী গৃহ আৱণ্টন দিয়াৰ নামত ৫-৬ হাজাৰ টকাকৈ উৎকোচ লোৱা বুলি একাংশ লোকে অভিযোগ উত্থাপন কৰিছে৷

উৎকোচ নিদিলে দুৰ্ব্যৱহাৰ কৰাৰ লগতে দৰিদ্ৰ লোকে হাতত লৈ যোৱা নথি-পত্ৰ দলিয়াই পেলােৱাৰ অভিযোগ উঠিছে৷ আনকি কোকিলা প্ৰথম খণ্ডৰ এজন লোকৰ পৰা কাজিয়াৰ মীমাংসা কৰি দিয়াৰ নামত ১ লাখ টকা জৰিমণা বিহিছিল। জৰিমণাৰ সমূদায় টকা আদায় কৰি মীমাংসাৰ প্ৰাপ্ত পক্ষক ১০ হাজাৰ টকা আদায় দি বাকী ৯০ হাজাৰ টকা সভাপতিয়ে আত্মসাৎ কৰে। টকা খুজিলে সভাপতিজনে নানা ধৰণৰ ভাবুকি দিয়ে বুলি অভিযোগ উত্থাপন কৰে বুলি জানিব পৰা গৈছে৷ পঞ্চায়তৰ ৮ গৰাকী সদস্য-সদস্যাই অনাস্থা প্ৰস্তাৱ অনাৰ পিছতে এটাৰ পিছত আন এটা কেলেংকাৰীৰ তথ্য ফাদিল হৈছে।