ডিজিটেল ডেস্কঃ পঞ্চভূতত বিলীন হ’ল দেশৰ দ্বিগজ ৰাজনৈতিক, প্ৰাক্তন ৰাষ্ট্ৰপতি ‘ভাৰত ৰত্ন’ প্ৰণৱ মুখাৰ্জীৰ নশ্বৰদেহ৷ সমগ্ৰ দেশে অশ্ৰুশিক্ত নয়নেৰে বিদায় যাচিলে সকলোৰে আদৰৰ প্ৰণৱ বাবুক৷ ৮৪ বছৰ বয়সত সোমবাৰে মৃত্যুক আকোৱালি লৈছিল প্ৰাক্তন ৰাষ্ট্ৰপতিগৰাকীয়ে৷ মঙলবাৰে ৰাজকীয় সন্মান প্ৰদান কৰি শেষকৃত্য সম্পন্ন কৰা হয় মুখাৰ্জীৰ৷ সৈন্য বিদায় প্ৰদান কৰা হয়৷

যোৱা মাহত মগজুৰ অস্ত্ৰোপচাৰ হৈছিল৷ তাৰ পিছতে হস্পিতালত থকাৰ সময়তে ক’ৰোনাত আক্ৰান্ত হৈছিল আৰু চিকিৎসাধীন অৱস্থাত ক’মাত যোৱাত সোমবাৰে সকেলাকে কন্দুৱাই চিৰবিদায় মাগে প্ৰাক্তন ৰাষ্ট্ৰপতিগৰাকীয়ে৷ মৃত্যুৰ পিছতে কেন্দ্ৰীয় চৰকাৰে ৭ দিনৰ ৰাষ্ট্ৰীয় শোক ঘোষণা কৰে৷ মঙলবাৰে দিনৰ ২ বজাত সম্পূর্ণ সামৰিক সম্মানেৰে বিদায় দিলে ভাৰতৰত্নক৷ ২ বজাৰ পিছত পঞ্চভূতত বিলীন হয় প্ৰাক্তন ৰাষ্ট্ৰপতিগৰাকী৷

ৰাষ্ট্ৰীয় মৰ্যদাৰে কেন্দ্ৰীয় চৰকাৰে দিল্লীস্থিত লোধী ৰ’ড শ্মশানত শেষকৃত্য সম্পন্ন কৰে৷ ভাৰতৰত্ন মুখাৰ্জীৰ মৃতদেহ দিল্লীস্থিত চৰকাৰী আৱাসত ৰখাৰ ব্যৱস্থা কৰিছিল চৰকাৰে৷ চৰকাৰী আৱাসত প্ৰধানমন্ত্ৰী নৰেন্দ্ৰ মোদীৰ লগতে শেষ শ্ৰদ্ধা জ্ঞাপন কৰে বহু লোকে৷ ইতিমধ্যে ৭ দিনীয়া ৰাষ্ট্ৰীয় শোক ঘোষণা কৰিছে কেন্দ্ৰীয় চৰকাৰে। চৰকাৰী-বেচৰকাৰী অনুষ্ঠান-প্ৰতিষ্ঠানত অৰ্ধনমিত হৈ থাকিব ৰাষ্ট্ৰীয় পতাকা।

এক অসাধাৰণ জীৱন যাত্ৰাৰ সামৰণি পৰে সোমবাৰে৷ ভাৰতীয় ৰাজনীতিৰ নক্ষত্ৰ প্ৰণৱ বাবুৱে চিৰবিদায় মাগিছিল সোমবাৰে৷ ১৯৩৫ চনৰ ১১ ডিচেম্বৰত জন্মগ্ৰহণ কৰা প্ৰণৱ মুখাৰ্জী দীৰ্ঘদিন ধৰি দিল্লীস্থিত সেনাৰ আৰএনআৰ হস্পিতালত চিকিৎসাধীন হৈ থকা প্ৰণৱ মুখাৰ্জীৰ সোমবাৰে আবেলি মৃত্যু হোৱা বুলি ঘোষণা কৰে৷ ২০১২ চনৰ ২০১৭ চনলৈ ৰাষ্ট্ৰপতিৰ পদত কাৰ্যনিৰ্বাহ কৰা প্ৰণৱ মুখাৰ্জী ভাৰতীয় কংগ্ৰেছ দলৰ জ্যেষ্ঠ নেতা আছিল৷

দেশৰ ১৩ সংখ্যাক ৰাষ্ট্ৰপতি হোৱাৰ পূৰ্বে কংগ্ৰেছ দলত থাকি কেন্দ্ৰীয় চৰকাৰৰ বহু কেইটা বিভাগৰ মন্ত্ৰী পদ চম্ভালিছে৷ ২০০৯ চনৰ পৰা ২০১২ চনলৈ দেশৰ বিত্তমন্ত্ৰী হিচাপে কাৰ্যনিৰ্বাহ কৰিছিল৷ ৰাষ্ট্ৰপতি পদৰ পৰা অৱসৰ গ্ৰহণ কৰাৰ পিছতে বৰ্তমানৰ ৰাষ্ট্ৰপতি ৰাম নাথ কোৱিন্দে ভাৰতৰত্ন সন্মানৰ বাবে নিৰ্বাচিত কৰে৷

১৯৬৯ চনত ইন্দিৰা গান্ধীৰ কাৰ্যকালত ৰাজ্যসভাৰ বাবে মনোনীত হৈ আছিল প্ৰণৱ বাবু৷ তাৰ পিছৰে পৰা লোকসভা-ৰাজ্যসভালৈ বাৰে বাৰে নিৰ্বাচিত হৈ আহিছে৷ কংগ্ৰেছৰ প্ৰতিখন চৰকাৰত মন্ত্ৰী পদ লাভ কৰিছিল৷ দেশৰ বাবে সেৱা কৰাৰ মনোভাৱেৰে কাম কৰিছিল৷ ৰাজনৈতিক জীৱনত বহু বেছি বিতৰ্কৰ সৈতে নাম সাঙোৰ খাই পৰা নাছিল প্ৰণৱ বাবুৰ৷

দেশৰ প্ৰাক্তন ৰাষ্ট্ৰপতি, ভাৰত ৰত্ন প্ৰণৱ মুখাৰ্জী শাৰীৰিক অৱস্থা অধিক জটীল হৈ পৰিছিল যোৱা দুদিন ধৰি৷ অত্যাধিক সংকটজনক অৱস্থালৈ গৈছিল প্ৰণৱ মুখাৰ্জীৰ অৱস্থা৷ মগজুৰ অস্ত্ৰোপচাৰ সম্পন্ন কৰাৰ পিছতে হাওঁফাওঁৰ সংক্ৰমণৰ ফলত শাৰীৰিক অৱস্থাৰ অত্যাধিক অৱনতি হৈছিল প্ৰাক্তন ৰাষ্ট্ৰপতিগৰাকীৰ৷ সোমবাৰে আবেলি পৰ্যন্ত ক’মাত আছিল প্ৰণৱ মুখাৰ্জী৷