স্কাই নিউজ ডেস্ক, গুৱাহাটীঃ ৰাজ্য চৰকাৰৰ বিত্তীয় পৰিস্থিত পূৰ্বতকৈ জটিল হৈ পৰিছে৷ বিশেষকৈ বানপানী আৰু গৰাখহনীয়াৰ সমখ্যা সমাধানৰ বাবে কেন্দ্ৰীয় চৰকাৰৰ পৰা আহিবলগীয়া এছডিআৰএফৰ পুঁজি কেন্দ্ৰই এতিয়ালৈ মুকলি কিৰ দিয়া নাই৷ এনে পৰিস্থিতিত ৰাজ্য চৰকাৰে ৰাজহ শিতানৰ জৰুৰীকালীন পুঁজি বান প্ৰতিৰোধৰৰ বাবে ব্যৱহাৰ কৰিব লাগিব৷ কেন্দ্ৰীয় চৰকাৰে পঞ্চদশ বিত্তীয় আয়োগত আনুদানসমূহ মুকলি কৰি নিদিয়াৰ বাবেও চৰম বিত্তীয় সংকটত ভূগি আছে ৰাজ্য চৰকাৰ৷ যোৱা এপ্ৰিল মাহতে পঞ্চদশ বিত্তীয় আয়োগৰ অনুদান ৰাজ্যসমূহে লাভ কৰিব লাগিছিল৷

ইফালে জিএছটিৰ ৰূপায়নৰ ফলত হোৱা বিত্তীয় ঘাটি কেন্দ্ৰীয় চৰকাৰে এতিয়ালৈকে অসম চৰকাৰক মুকলি কৰি দিয়া নাই৷ প্ৰধানমন্ত্ৰী নৰেন্দ্ৰ মোদীয়ে ঘোষণা কৰা ২০ লাখ কোটি টকাৰ পেকেজৰ লগত জড়িত আঁচনিসমূহৰ বাদ দি সকলো ধৰণৰ উন্নয়ন মূলক কাম-কাজ কেন্দ্ৰীয় চৰকাৰে ইকিমধ্যে বন্ধ কৰি থৈছে৷ ৰাজ্য চৰকাৰৰ নিজৰ ৰাজহ সংগ্ৰহৰ উৎস সমূহো লাহে লাহে টুটি আহিছে৷ পেট্ৰল-ডিজেলৰ দাম বাঢ়িছে যদিও ইয়াৰ ফলত ৰাজ্য চৰকাৰ লাভৱান নহয়৷ এনেদৰেই আবকাৰী শুল্ক বৃদ্ধি কৰা হৈছে যদিও ইয়াৰ পৰা প্ৰত্যক্ষভাৱে ৰাজ্য চৰকাৰে লাভাৱান্বিত নহয়৷ পেট্ৰল-ডিজেলৰ ৰয়েল্টি হিচাপে মাহেকত ২০০-২৫০ কোটি টকা ৰাজ্য চৰকাৰে লাভ কৰে৷

শেহতীয়া খবৰ মতে, জিএছটি পদ্ধতিৰে কৰ সংগ্ৰহ হোৱাৰ পিছত ৰাজ্য চৰকাৰৰ আন এক ৰাজহ সংগ্ৰহৰ উৎস বন বিভাগৰ লেভি উঠোৱা ৰাজ্য চৰকাৰে বন্ধ কৰি দিছে৷ যোৱা ১৬ জুনত বন আৰু পৰিবেশ বিভাগৰ সচিব মাধুৰিমা বৰুৱা সেনে দিয়া এক নিৰ্দেশ যোগে বন বিভাগক সকলো লেভি আৰু টোল সংগ্ৰহ বন্ধ কৰি দিছে৷ ১১৮/২০১৪/পিটি/২৫৮ নিৰ্দেশৰ দ্বাৰা ৰাজ্যৰ বন বিভাগৰ প্ৰধান মুখ্য সংৰক্ষকক জনাই দিছে যে জিএছটি অক্ট-২০১৭ চনৰ ১০৩ নং ধাৰা অনুযায়ী ৰাজ্যৰ বন বিভাগে এতিয়াৰ পৰা কোনো ধৰণৰ লেভি বা উপ-কৰ সংগ্ৰহ কৰিব নোৱাৰিব৷

ইয়াৰ ফলত বন বিভাগৰ নিজৰ ৰাজহ সংগ্ৰহৰ উৎস বন্ধ হৈ পৰিল৷ বন বিভাগে নিজে উন্নয়ন কৰা ৰাস্তা-পদূলি বা ঘাটৰ ওপৰত লেভিৰ দ্বাৰা ৰাজহ সংগ্ৰহ কৰাৰ লগতে অবৈধ কাঠৰ বিষয়টো তদাৰক কৰিবলৈ বা বন্ধ কৰিবলৈ টোল গেটসমূহ স্থাপন কৰিছিল৷ ইয়াৰ দ্বাৰা চৰকাৰে মাহেকত কেইবা শ কোটি টকা ৰাজহ গোটাবলৈ সক্ষম হৈছিল৷ কিন্তু জিএছটি আইনৰ দোহাই জি ৰাজ্য চৰকাৰে শেহতীয়া ভাৱে লেভি সংগ্ৰহ বন্ধ কৰি হাতৰ কুঠাৰ ভৰিত মৰাৰ দৰে সিদ্ধান্ত গ্ৰহণ কৰিছে৷ বিত্তীয় সংকটত ভূগি থকা ৰাজহ সংগ্ৰহৰ উৎস বৃদ্ধি কৰাৰ পৰিবৰ্তে এটা এটাকৈ বন্ধ কৰি কেন্দ্ৰীয় চৰকাৰৰ শৰনাপন্ন হোৱাৰ পৰিলক্ষিত হৈছে৷