নুমলীগড়ঃ উজনিত অইল ইণ্ডিয়া লিমিটেডৰ বিৰুদ্ধে খৰ্গহস্ত হৈ পৰিছে ৰাইজ৷ বাঘজানত তৈল খাদত বিস্ফোৰণ সংঘটিত হৈ দুগৰাকীকৈ লোকে প্ৰাণ হেৰুওৱাৰ লগতে কেইবা হাজাৰ লোকে শৰণাৰ্থী শিবিৰত থাকিবলগীয়া হোৱাৰ সময়তে এইবাৰ অসমৰ মানুহৰ আবেগ জড়িত এটা ৰজাদিনীয়া গড় খান্দি তেলৰ পাইপ বহুওৱাৰ ঘটনাই তীব্ৰ চাঞ্চ্যলৰ সৃষ্টি কৰিছে৷

নুমলীগড়ৰ ঐতিহাসিক নুমলীকুঁৱৰী গড় খান্দি ধ্বংস কৰা কাৰ্যৰ চাঞ্চল্য অব্যাহত থকাৰ সময়তে আছুৰ কেন্দ্ৰীয় সাধাৰণ সম্পাদক লুৰিণজ্যোতি গগৈ উক্ত ঠাই ভ্ৰমণ কৰে৷ লুৰিণজ্যোতি গগৈ সহ আছুৰ স্থানীয় নেতাৰ লগতে এটা প্ৰতিনিধি দলে উক্ত অঞ্চল ভ্ৰমণ কৰি আচৰিত হৈ পৰে৷ অসমীয়া জাতিৰ আবেগ জড়িত হৈ থকা ৰজাদিনীয়া গড় খান্দি পেলোৱা কাৰ্যক ধিক্কাৰ দিয়ে আছুৱে৷ এই কাৰ্য কৰা সকলৰ বিৰুদ্ধে শাস্তিৰ পোষকতা কৰে আছুৱে৷

অঞ্চল পৰিদৰ্শন কৰি অইলৰ এনে কাৰ্য বন্ধ কৰিবলৈ দাবী জনাই লুৰিণজ্যোতি গগৈয়ে৷ নুমলীগড়ত অইল ইণ্ডিয়া লিমিটেডে বুলডজাৰ চলাই কছাৰী ৰজাৰ স্বাক্ষৰ বহন কৰা নুমলীকুঁৱৰীৰ গড় খান্দি ধ্বংস কৰাই নহয় অইলে গড়টো দ্বিখণ্ডিত কৰি পাইপ বহুৱাইছে বুলি কয় আছুৱে৷

অইল ইণ্ডিয়া লিমিটেডে গড় ধ্বংস কৰা কাৰ্যক তীব্ৰ ভাষাৰে গৰিহণা দি আছুৰ সাধাৰণ সম্পাদক লুৰিণজ্যোতি গগৈৰ এই কাৰ্য বন্ধ কৰিবলৈ দাবী জনােৱাৰ লগতে ইফালে প্ৰশাসনৰ সন্মুখতে গড়টো খান্দি তচ-নচ কৰাত জাঙুৰ খাই উঠিছে জীপাল শ্ৰমিক সংঘ, আছু, আটাছু, যুৱ-ছাত্ৰ পৰিষদকে ধৰি স্থানীয় দল-সংগঠন তথা স্থানীয় ৰাইজ।

অভিযোগ মতে, পূৰাতত্ব বিভাগৰ মানচিত্ৰৰ পৰা ঐতিহাসিক সমল নিঃশ্চিহ্ন কৰাৰ ষড়যন্ত্ৰত লিপ্ত হৈছে অইল ইণ্ডিয়া কৰ্তৃপক্ষ। ইফালে গড়টোৰ যি স্থানত অইলে পাইপ বহুওৱাৰ নামত খনন চলাইছে সেই স্থানতে আছিল এটা হস্তী দণ্ডী। যাৰ বাবেই এতিয়া সৰ্বত্ৰ উঠিছে প্ৰতিবাদৰ জোৱাৰ। জাঙুৰ খাই উঠিছে দল সংগঠন। এতিয়া প্ৰশ্ন হয় অইল ইণ্ডিয়াই কাৰ অনুমতি সাপেক্ষে খান্দি নিঃশেষ কৰিছে বুৰঞ্জী প্ৰসিদ্ধ নুমলী কুঁৱৰী গঁড় আৰু হস্তী দণ্ডী।