কামপুৰঃ তিনিটা কাৰ্য্যকালত স্বাস্থ্য মন্ত্ৰী হৈ থকা আৰু বৰ্তমানৰ চৰকাৰৰ প্ৰভাৱশালী মন্ত্ৰী হিমন্ত বিশ্ব শৰ্মাই আঠ বছৰেও মুকলি কৰিব নোৱাৰিলে এখন স্বাস্থ্য কেন্দ্ৰৰ। উল্লেখযোগ্য যে, ২০১২ চনতেই নিমাৰ্ণ সম্পূৰ্ণ হৈছিল নগাঁও জিলাৰ কন্দলী স্বাস্থ্য কেন্দ্ৰৰ। কিন্তু আজিও আনুষ্ঠানিকভাৱে মুকলি নহ’ল সেই স্বাস্থ্য কেন্দ্ৰটো।

জানিব পৰা মতে, কিছুদিন আগতে স্বাস্থ্য কেন্দ্ৰটোত এগৰাকী চিকিৎসক নিযুক্তি দিয়া হৈছিল যদিও কোভিড ৰোগীৰ চিকিৎসাৰ বাবে গুৱাহাটী লৈ যোৱা হয়। চিকিৎসালয়খন বন্ধ হৈ যোৱাৰ ফলত স্থানীয় ৰাইজে চিকিৎসা সেৱাৰ ক্ষেত্ৰত যথেষ্ট সমস্যাত ভোগাৰ লগতে চিকিৎসালয়ৰ চৌহদত হাবি জংঘলৰে ভৰি পৰিছে।

ইফালে বছৰ বছৰ ধৰি পৰিত্যক্ত হৈ থকাৰ ফলত ঠাইতে পঁচিবলৈ আৰম্ভ কৰিছে স্বাস্থ্য কেন্দ্ৰটোৰ সা-সামগ্ৰী। তাৎপৰ্যপূৰ্ণভাবে কিছুদিন আগতে চিকিৎসালয় খনৰ কিছু যন্ত্ৰ পাতি অন্য চিকিৎসায়লৈ স্থানান্তৰিত কৰা হৈছে বুলিও জানিব পৰা গৈছে। স্থানীয় ৰাইজে বঢ়মপুৰ সমষ্টিৰ অতি ভিতৰুৱা অঞ্চলত থকা স্বাস্থ্য কেন্দ্ৰখনত চিকিৎসক নিয়োগ কৰি অঞ্চলৰটোৰ স্বাস্থ্যখণ্ডৰ উন্নয়ন সম্ভৱ কৰাৰ দাবী জনাইছে।