ডিজিটেল ডেস্কঃ খিলঞ্জীয়া মানুহৰ জীৱনৰ নিৰাপত্তা নোহোৱা হৈছে নে কি অসমত? ইজনৰ পিছত সিজন খিলঞ্জীয়া লোকে অকালতে মৃত্যুক আকোৱালি ল’ব লগা হৈছে৷ তিনিদিন পূৰ্বে এগৰাকী খিলঞ্জীয়া যুৱকক গুৱাহাটীৰ ৰাজপথত ডিঙি ৰেপী হত্যা কৰাৰ ঘটনাৰ চাঞ্চল্য মাৰ নৌযাওতেই এইবাৰ উজনি অসমৰ এগৰাকী যুৱকক সেনাই ঘৰৰ পৰা উঠাই নিয়াৰ পিছতে মৃত্যুক আকোৱালি লোৱাৰ ঘটনাই চাঞ্চল্যৰ সৃষ্টি কৰিছে৷ এই কাণ্ড সংঘটিত হৈছে যোৰহাট জিলাৰ বৰহোলাত৷

জানিব পৰা মতে, বৰহোলাৰ থানাৰ অন্তৰ্গত বালিজান গাভৰুআলীৰ প্ৰাক্তন সেনাজোৱান হেম বৰাৰ পুত্ৰ জয়ন্ত বৰাক যোৱা নিশা সেনাই ঘৰৰ পৰা উঠাই নিছিল৷ চৰাইদেউ জিলাৰ সেনাই ঘৰৰ পৰা উঠাই নিয়াৰ পিছতে সেনাৰ জিম্মাত যুৱকজনৰ মৃত্যু হয়৷ এই ঘটনাই তীব্ৰ চাঞ্চল্যৰ সৃষ্টি কৰিছে৷ ৰহস্যজনক মৃত্যুক লৈ ছ’চিয়েল মিডিয়া গৰম হৈ পৰিছে৷

পৰিয়াল দাবী কৰা মতে, সোমবাৰে নিশা প্ৰায় ২ বজাত সেনাৰ এটা দলে আৰক্ষীক লগত লৈ জয়ন্ত বৰাৰ ঘৰত উপস্থিত হৈ অস্ত্ৰ বিচাৰি তালাচী চলায়। সেনাই তালাচী চলালেও অস্ত্ৰৰ শুংসুত্ৰ নোপোৱাৰ পিছতে ২৩ বছৰীয়া জয়ন্ত বৰাক তিনিখন কাগজত স্বাক্ষৰ কৰিই সেনাই গাড়ীত উঠাই লৈ যায়।

সেনাই যুৱকজনক কলৈ লৈ তাৰ তথ্য পৰিয়ালৰ দিয়া নাছিল। জানিব পৰা মতে, জয়ন্তৰ স্বাস্থ্যৰ গুৰুতৰ অৱস্থাত বৰহোলা আৰক্ষীক গতাই দিয়ে৷ বৰহোলাৰ সামূহিক চিকিৎসালয়লৈ প্ৰেৰণ কৰাৰ পিছতে পুৱা যুৱকজনৰ হঠাতে মৃত্যু হয়৷

জয়ন্ত বৰাৰ মৃতদেহ যোৰহাট চিকিৎসা মহাবিদ্যালয়ত ৰখা হৈছে। জয়ন্ত বৰা নামৰ যুৱকজনৰ পিতৃ প্ৰাক্তন সেনা জোৱান আছিল আৰু ৮ বছৰৰ পূৰ্বে মৃত্যু হৈছে।