নিশা মুকলি আকাশৰ তললৈ আহিল ৰাষ্ট্ৰীয় সুৰক্ষা আইনৰ অধীনত কাৰাৰুদ্ধ চিকিৎসক কাফিল
- Update Time : Wednesday, September 2, 2020
- 124 Time View
ডিজিটেল ডেস্কঃ মঙলবাৰে নিশা ১২ বজাত মথুৰা কাৰাগাৰৰ পৰা মুকলি আকাশৰ তললৈ আহে চিকিৎসক কাফিল খান৷ এলাহাবাদ উচ্চ ন্যায়ালয়ৰ নিৰ্দেশৰ পিছতে চিকিৎসক কাফিল খানক মুকলি কৰি দিয়ে জেল কৰ্তৃপক্ষই৷ নাগৰিকত্ব সংশোধনী আইন বিৰোধী আন্দোলনত অংশ লৈ বিদ্বেষমূলক ভাষণ দিয়াৰ অভিযোগ উত্থাপন কৰি উত্তৰ প্ৰদেশ চৰকাৰে ৰাষ্ট্ৰীয় সুৰক্ষা আইনৰ অধীনত গ্ৰেপ্তাৰ কৰিছিল কাফিল খানক৷
মঙলবাৰে দিনৰ ভাগত এলাহাবাদ উচ্চ ন্যায়ালয়ে উত্তৰ প্ৰদেশ চৰকাৰক কাফিল খানৰ বিৰুদ্ধে ৰাষ্ট্ৰীয় সুৰক্ষা আইনৰ অধীনত গ্ৰেপ্তাৰ কৰা কাৰ্য বেআইনী বুলি কৈ শীঘ্ৰে মুকলি কৰি দিয়াৰ নিৰ্দেশ দিছিল৷ তাৰ পিছতে মঙলবাৰে গভীৰ নিশা মথুৰা কাৰাগাৰৰ পৰা মুকলি কৰি দিয়ে কাফিল খানক৷ পৰিয়ালে কাফিল খানক পুনৰ কোনো গোচৰত গ্ৰেপ্তাৰ কৰাৰ আশংকা কৰাৰ লগতে কাৰাগাৰ কৰ্তৃপক্ষৰ বিৰুদ্ধে আদালতৰ ৰায় অমান্য কৰাৰ গোচৰ তৰিব বুলি জানিবলৈ দিয়ে৷
