নিদ্ৰামগ্ন বিধায়ক, পথ নিৰ্মাণৰ দাবীত নাহৰকটীয়াত জাকৈ, জুলুকি, ভুঁই ৰুই প্ৰতিবাদ
- Update Time : Wednesday, July 8, 2020
- 418 Time View
নাহৰকটীয়াঃ ডিব্ৰুগড় জিলাৰ নাহৰকটীয়াৰ চাচনী-টিংখং সংযোগী প্ৰায় ১৫ কিঃ মিঃ দৈৰ্ঘৰ পথটো সম্প্ৰতি জৰাজীৰ্ণ হৈ পৰাত আহ-যাহ কৰিব পৰা পৰিবেশ নোহোৱা হৈ পৰিছে৷ ফলত যাতায়াতকাৰীয়ে যমৰ-যাতনা ভোগ কৰিবলগীয়া হৈছে৷ পথটো পুখুৰী সদৃশ গাঁতেৰে ভৰি পৰিছে৷ আনকি পথৰ দ-গাঁতত পৰি বহু কেইটা দুৰ্ঘটনা সংঘটিত হোৱাৰ কথাও জানিবলৈ দিয়ে স্থানীয় ৰাইজে৷
পথটো মেৰামতিৰ বাবে গড়কাপ্তানি বিভাগক কেইবাবাৰো আবেদন কৰিছিল ৰাইজে৷ কিন্তু আজিকোপতি কোনো ব্যৱস্থা গ্ৰহণ কৰা পৰিলক্ষিত নহ’ল৷
গভীৰ নিদ্ৰাত থকা স্থানীয় বিধায়ক নৰেণ সোণোৱালক ৰাইজে বাৰম্বাৰ আবেদন-নিবেদন কৰিছিল৷ কিন্তু চকু মুদা কুলিৰ ভাও ধৰা বিধায়কগৰাকীয়ে কোনো ব্যৱস্থা গ্ৰহণ নকৰিলে৷
অৱশেষত উপায়হীন ৰাইজে পথৰ দ’ গাঁতত জাকৈ জুলুকি লৈ ভূঁই ৰুই প্ৰতিবাদ সাব্যস্ত কৰে৷ যদিহে বিধানসভাৰ নিৰ্বাচনৰ আগতে পথটো মেৰামতি নকৰে তেন্তে গাঁৱত কোনো ৰাজনৈতিক দলৰ নেতা-কৰ্মীক প্ৰৱেশ নিষিদ্ধ কৰিব বুলি স্পষ্ট কৰে গাওঁবাসীয়ে।
