নাহৰকটীয়াঃ নাহৰকটীয়া সমষ্টিত আজিও অপৰিবৰ্তিত বান পৰিস্থিতি৷ কেইবা হাজাৰ লোক বানৰ কৱলত পৰি বিপদৰ মাজেৰে দিন অতিবাহিত কৰিছে৷ পানীৰ বুকুত ঘৰ খন এৰি অহা দুৰ্ভগীয়া লোকসকলে দুখৰ মাজেৰে দিন অতিবাহিত কৰিছে৷ সন্তানৰ শুকান মুখ দেখি হৃদয় কঁপি উঠে বুকু৷ ঘৰখনলৈ মনত পৰিলে অন্তৰ কঁপি উঠে৷ জীৱন ব্যাপি কঁপালৰ ঘাম মাটিত পেলাই ঘৰ খন সাজি-কাঁচি তোলে মানেই বান আহি পলকতে সকলো তচ-নচ কৰি থৈ যায়৷

দুৰ্ভগীয়া লোকসকলে কৰিব কি? বান আৰু গৰাখহনীয়াৰ স্থায়ী সমাধান বিচাৰি ভোট দান কৰে যদিও সময়ত সকলো মিছা বুলি প্ৰতিপন্ন হয়৷ কেৱল সকলো হেৰুওৱাৰ পিছতে জনপ্ৰতিনিধিয়ে এটা খবৰ লয় আৰু আগৰ দৰে হৈ পৰে সময়বোৰ৷ এইবাৰো ভয়াবহ বানৰ কৱলত পৰিছে সমষ্টিৰ কেইবাহাজাৰ পৰিয়াল৷ এইবাৰো দুখৰ অন্ত নাই কৃষিজীৱিৰ৷ বুঢ়ীদিহিং নৈৰ পানীয়ে বহু গাঁও প্লাৱিত কৰিছে৷

তাৰে মাজৰ এখন গাঁও চাচনী টিংৰাই নেপালী গাঁৱত বানপীড়িতৰ খবৰ লয় বিধায়ক নৰেণ সোণোৱালে৷ বান পৰিস্থিতি পৰিদৰ্শন কৰি নাহৰকটীয়াৰ বিধায়ক সোণোৱালে বানাক্ৰান্তসকলৰ কিছু শুকান খাদ্য-সামগ্ৰী বিতৰণ কৰে। তাৰ পিছতেই বিধায়কগৰাকীয়ে আশ্ৰয় শিবিৰসমূহ পৰিদৰ্শন কৰি এটা স্বাস্থ্য শিবিৰ অনুষ্ঠিত কৰাৰ লগতে পোহনীয়া গৰু-ছাগলীৰ বাবে খাদ্য যোগান ধৰাৰ প্ৰতিশ্ৰুতি দিয়ে৷