চতিয়াঃ উচ্চ আকাংক্ষা আৰু একগ্ৰতাই মানুহক সফল কৰে৷ চতিয়াৰ চাৰেঙিয়া গাঁৱৰ দৰিদ্ৰ কৃষক পৰিয়ালৰ সন্তান প্ৰিয়াংকু বৰমূদৈয়ে তাকেই প্ৰমাণ কৰিছে। মেধাৱী ছাত্ৰগৰাকীয়ে সদ্য ঘোষিত উচ্চতৰ মাধ্যমিক পৰীক্ষাত ৯১ শতাংশ নম্বৰ লাভ কৰি সুখ্যাতিৰে উত্তীৰ্ণ হৈ চতিয়াৰ চাৰেঙিয়ালৈ গৌৰৱ কঢ়িয়াই আনিবলৈ সক্ষম হৈছে৷

মাথো ১১ নম্বৰৰ বাবে ৰাজ্যৰ ভিতৰত ১০গৰাকী ভিতৰত স্থান লাভ কৰিব নোৱাৰিলে প্ৰিয়াংকুৱে। প্ৰিয়াংকু বৰমূদৈ স্থানৰ যুঁজত জয়ী হৈ শিৰোনাম দখল কৰিব নোৱাৰিলেও আন এটা বিষয়তহে বাতৰিৰ শিৰোনামলৈ আহিছে৷ দৰিদ্ৰতাৰ সৈতে যুঁজিহে প্ৰিয়াকুৱে চৰ্চালৈ আহিছে৷ কিয়নো তেওঁ হাইস্কুল শিক্ষান্ত পৰীক্ষাত উত্তীৰ্ণ হৈ নামভৰ্তি কৰিবলৈ অৰ্থৰ অভাৱত পৰিছিল৷ তাৰ পিছতে তেওঁক এখন শিক্ষানুষ্ঠানে বিনা পইছাই পঢ়াবলৈ আগবাঢ়ি আহে৷ উক্ত শিক্ষানুষ্ঠানত বিনা পইছাই নামভৰ্তি কৰি উচ্চতৰ মাধ্যমিকৰ দুটা বছৰ পঢ়াৰ অন্তত পুনৰ সফল হৈছে প্ৰিয়াংকু৷

দৰিদ্ৰ পৰিয়ালৰ সন্তান প্ৰিয়াংকুৱে ৯১ শতাংশ নম্বৰ লাভ কৰি লাভ সফলতা লাভ কৰিছে। চতিয়াৰ জ্ঞানজ্যোতি কনিষ্ঠ মহাবিদ্যালয়ত অধ্যয়ন কৰা ছাত্ৰ প্ৰিয়াংকুক কনিষ্ঠ মহাবিদ্যালয়ে বিনা মাচুলে পঢ়াৰ সুবিধা প্ৰদান কৰিছিল। ব্যক্তিগত খণ্ডৰ কনিষ্ঠ মহাবিদ্যালয় বিনা মাচুলে পঢ়ি সফলতা কঢ়িয়াই অনা প্ৰিয়াংকুৱে শিক্ষাজগতত বহু আগুৱাই যাব খোজে৷ শিক্ষা জীৱনত তেওঁক চতিয়াৰ জ্ঞানজ্যোতি মহাবিদ্যালয়ে পঢ়াৰ সুবিধা দিয়াৰ বাবে বিদ্যালয়খনৰ গৰাকী বিৰাজ গগৈক ধন্যবাদ যাচে। দৰিদ্ৰ পৰিয়ালৰ সন্তান প্ৰিয়াংকু বৰমূদৈয়ে এজন প্ৰশাসনিক বিষয়া হোৱাৰ সপোনলৈ কটন বিশ্ববিদ্যালয়ত উচ্চ শিক্ষা গ্ৰহণৰ হেপাহ পুহি ৰাখিছে৷ আৰ্থিক দৈন্যতাৰ পিছতো প্ৰিয়াংকুক আকাশ স্পৰ্শ কৰিব পৰাকৈ শুভ কামানা যাচিছে স্থানীয় ৰাইজে৷