নাজিৰাঃ নাজিৰা সমষ্টিৰ অন্তৰ্গত জয়মতী পঞ্চায়তত দেওবাৰে বহু কেইজন যুৱকে কংগ্ৰেছৰ আদৰ্শৰ প্ৰতি আকৃষ্ট হৈ নাজিৰা ব্লক কংগ্ৰেছ কমিটীৰ কাৰ্য্যকৰী সভাপতি মৃদুল বৰগোহাঁইৰ লগতে বহু কংগ্ৰেছ কৰ্মীৰ উপস্থিতিত কংগ্ৰেছ দলত যোগদান কৰে। উল্লেখযোগ্য যে, ৰাজ্যিক বিজেপিৰ যুৱ মৰ্চাৰ সাধাৰণ সম্পাদক ময়ূৰ বৰগোহাঁইৰ গৃহ পঞ্চায়ত হিচাপে পৰিচিত এই জয়মতী পঞ্চায়তৰ বহু উদ্যমী যুৱকে কংগ্ৰেছ দলত যোগদান কৰাক লৈ ৰাইজৰ মাজত বহু প্ৰশ্নৰ অৱতাৰণা হৈছে। অসমৰ ৰাজনীতিৰ প্ৰেক্ষাপট সঘনে সলনি হৈ থকাৰ সময়তে বহু সদস্যই বিজেপিত যোগদান কৰিছে আৰু ইয়াৰ সমান্তৰালভাৱে বহু সদস্যই কংগ্ৰেছত যোগদান কৰিছে । যিহেতু নাজিৰা সমষ্টিৰ বিজেপিৰ সম্ভাৱনীয় প্ৰাৰ্থী হিচাপে ময়ূৰ বৰগোহাঁইকো প্ৰক্ষেপ কৰাৰ কথা বহুতৰে মুখত চৰ্চা হৈছে । সমাজকৰ্মী হিচাপে ময়ূৰ বৰগোহাঁই পৰিচিত যদিও তেওঁৰ গৃহ অঞ্চলত যি ধাৰাত কংগ্ৰেছৰ উত্থান হৈছে তাক লৈ বিজেপিয়ে কি পদক্ষেপ গ্ৰহণ কৰে লক্ষ্যনীয় হ’ব। ইয়াৰোপৰি শিৱসাগৰ জিলা বিজেপিৰ উপ-সভাপতি প্ৰবিন কোঁৱৰৰ গৃহ অঞ্চল হিচাপে পৰিচিত নাজিৰা সমষ্টিৰ অন্তৰ্গত ৰহদৈ পঞ্চায়তৰ ১০নং ৱাৰ্ডৰ শাসকীয় দলৰ ৱাৰ্ড সদস্যা সহ তেখেতৰ পৰিয়ালে যোগদান কৰে কংগ্ৰেছত। বিজেপিৰ জনবিৰোধী আৰু মিছা প্ৰতিশ্ৰুতিৰ প্ৰতি ক্ষোভিত হৈ, নতুনক পাই পুৰণিক গুৰুত্ব প্ৰদান নকৰা বাবে বিজেপি ত্যাগ কৰি কংগ্ৰেছত যোগদান কৰিছে বুলি জানিবলৈ দিয়ে কংগ্ৰেছত যোগদান কৰা সকলে ।