বেবেজীয়াঃ মুফতি খাইৰুল ইছলামৰ জানাজাত হোৱা বিশাল জনসমাগমৰ বাবে নগাঁও জিলাৰ জুৰীয়াৰ দগাঁও, পৰমাইভেটি আৰু ধিং গাঁৱত সাতদিনৰ বাবে সম্পূৰ্ণ লকডাউন ঘোষণা কৰিছে নগাঁও জিলা উপায়ুক্তই ৷

অহা ৫ জুলাইৰ বিয়লি ৩ বজাৰ পৰা কঠোৰভাবে বলবৎ হ’ব এই লকডাউন ৷ সেয়ে উক্ত অঞ্চলকেইটাৰ জনসাধাৰণক কাইলৈ বিয়লি ৩ বজাৰ পূৰ্বেই অত্যাৱশ্যকীয় সামগ্ৰী সংগ্ৰহ কৰাৰ আহ্বান জনাইছে উপায়ুক্তগৰাকীয়ে ৷

লকডাউনৰ দিনকেইটাত কোনো লোক সেই অঞ্চলকেইটাত ওলোৱা আৰু সোমোৱাত নিষেধাজ্ঞা জাৰি কৰিছে জিলা প্ৰশাসনে ৷ আজি আয়োজিত এক সংবাদমেলৰ জৰিয়তে এই ঘোষণা কৰে নগাঁও জিলাৰ উপায়ুক্ত যাদৱ শইকীয়াই ৷

ধিঙৰ বিধায়ক আমিনুল ইছলামৰ পিতৃ, মুফতি খাইৰুল ইছলামৰ জানাজাত কেইবা সহস্ৰাধিক লোকৰ সমাগম হোৱা সন্দৰ্ভত সৰ্বত্ৰে ব্যাপক প্ৰতিক্ৰিয়াৰ উদ্ভৱ হোৱাত উপায়ুক্ত যাদৱ শইকীয়াই আয়োজন কৰিছিল এই সংবাদমেলৰ ৷

উল্লেখ্য, সম্প্ৰতি কৰ’না মহামাৰীৰ প্ৰতিৰোধৰ বাবে আৰোপ কৰা চৰকাৰী নীতি-নিৰ্দেশনাক সম্পূৰ্ণ আওকাণ কৰি মুফতি খাইৰুল ইছলামৰ জানাজাত সংঘটিত হোৱা এনে ভয়াৱহ পৰিস্থিতিৰ সন্দৰ্ভত ধিঙৰ চক্ৰ বিষয়াই দিয়া এজাহাৰৰ ভিত্তিত আৰু আৰক্ষীয়ে নিজাববীয়াকৈ জুৰীয়া আৰক্ষী থানাত ডি এম এক্টৰ অধীনত ২৫৯/২০২০ আৰু ২৬২/২০২০ নম্বৰত দুটাকৈ গোচৰ ৰুজু কৰি ইতিমধ্যে তদন্ত আৰম্ভ কৰিছে আৰক্ষীয়ে ৷