জয়ন্ত মুদৈ, বেবেজীয়াঃ ৰাজ্যত ক’ৰোনা প্ৰতিৰোধৰ বাবে চৰকাৰ তৎপৰ হৈ পৰাৰ সময়তে ক’ৰোনা পজিটিভ ধৰা পৰা এজন লোকৰ ক্ষেত্ৰত স্বাস্থ্য বিভাগে চৰম অৱজ্ঞা প্ৰদৰ্শন কৰাৰ দৰে এক চাঞ্চল্যকৰ ঘটনা সংঘটিত হৈছে নগাঁও জিলাৰ বেবেজীয়াত।

আনকি স্বাস্থ্য বিভাগৰ পৰা ক’ৰোনাত আক্ৰান্ত বুলি খবৰ দিয়াৰ সম্পূৰ্ণ ২৭ ঘন্টাৰ পিছতহে আক্ৰান্ত লোকজনক স্বাস্থ্য বিভাগে চিকিৎসালয়লৈ নি দায়িত্বহীনতাৰ পৰিচয় দিলে তাক লৈ এতিয়া ৰাইজৰ মাজত ব্যাপক প্ৰতিক্ৰিয়াৰ সৃষ্টি হৈছে৷

জানিব পৰা মতে, বেবেজীয়াৰ জলময়ী গাঁৱৰ অসম আৰক্ষীৰ বেটেলিয়নত কৰ্মৰত প্ৰেমেশ্বৰ বৰদলৈ (৫২) যোৱা ২০ জুনত কাৰ্বিআংলং জিলাৰ মিচিং বাইলঙৰ পৰা নিজ গৃহলৈ আহি স্বাস্থ্য বিভাগৰ নিয়ম মানি হোম কোৱাৰেন্টাইনত আছিল।

ইয়াৰ মাজতে যোৱা ২৩ জুনত তেওঁৰ স্বাৱ সংগ্ৰহ কৰি স্বাস্থ্য বিভাগে পৰীক্ষাৰ বাবে প্ৰেৰণ কৰিছিল। এনেদৰে হোম কোৱাৰেণ্টাইনত থকা অৱস্থাতে কালি পুৱা ৯ বাজি ৩০ মিনিটত স্বাৱ পৰীক্ষাৰ ফলাফলত কোৱিড-১৯ পজিটিভ অহা বুলি বিভাগীয় জনোৱাৰ লগতে স্বাস্থ্য বিভাগৰ লোক গৈ তেওঁক ঘৰৰ পৰা চিকিৎসালয়লৈ লৈ যাব বুলি অৱগত কৰে৷

সেয়ে ক’ৰোনাত আক্ৰান্ত লোকজনে সেই খবৰ পোৱাৰ পিছতে চিকিৎসালয়লৈ যাবৰ বাবে সাজু হৈ থাকে যদিও স্বাস্থ্য বিভাগৰ দলহে সময়মতে উপস্থিত নোহোৱাত লোকজনৰ লগতে সমগ্ৰ পৰিয়ালটো উদ্বিগ্নতাৰে সময় অতিবাহীত কৰিবলগীয়াত পৰে৷

ইয়াৰ মাজতে লোকজনৰ পৰিয়ালৰ লোকে বহুবাৰ স্বাস্থ্য বিভাগৰ হেল্প লাইন নম্বৰত যোগাযোগ কৰে যদিও প্ৰতিবাৰেই ৰোগী অনা গাড়ী নথকাকে ধৰি নানা অজুহাত দেখুৱাই জিলা প্ৰশাসনৰ গালৈ দোষ থেলি দি সোনকালেই গাড়ী পঠাই দিয়াৰ কথাহে কয়৷

কিন্তু এনেদৰে চৰম দায়িত্বহীনতাৰ পৰিচয় দি ক’ৰোনা আক্ৰান্ত লোকজনক নিবলৈ নাহি লোকজনৰ লগতে তেওঁৰ পৰিয়াল তথা প্ৰতিবেশী লোকসকলক উজাগৰি নিশা কটাবলৈ বাধ্য কৰি আজি দুপৰীয়া ১২ বাজি ৩০ মিনিটতহে স্বাস্থ্য বিভাগৰ দল আহি লোকজনক চিকিৎসালয়লৈ লৈ যায়৷