মঙলদৈঃ কাৰাবন্দী কৃষক নেতা অখিল গগৈৰ মুক্তিৰ দাবীত কৰা প্ৰতিবাদ সামৰি এইবাৰ আইনী যুঁজ কৰিবলৈ সাজু হৈছে কৃষক মুক্তি সংগ্ৰাম সমিতি আৰু ছাত্ৰ মুক্তি সংগ্ৰাম সমিতি৷ কৃষক মুক্তি সংগ্ৰাম সমিতি আৰু ছাত্ৰ মুক্তি সংগ্ৰাম সমিতিয়ে দিল্লী উচ্চতম ন্যায়ালয়ৰ বিশিষ্ট অধিবক্তাৰ দ্বাৰা উচ্চ ন্যায়ালয়ত গোচৰ চলোৱাৰ বাবে সাজু হৈছে৷ ইতিমধ্য কৃষক মুক্তি সংগ্ৰাম সমিতিয়ে আইনী প্ৰক্ৰিয়া ব্যয়বহুল হ’ব বুলি অসমৰ ৰাইজক অৱগত কৰি গোচৰ কাৰ্য চলাই নিবৰ বাবে অসমৰ ৰাইজৰ পৰা দান-বৰঙণি বিচাৰিছে৷

এটা বেংক একাউণ্ট নম্বৰ মুকলি কৰি কৃষক মুক্তিয়ে ৰাইজৰ পৰা বৰঙণি বিচৰাৰ পিছৰে পৰা ৰাজ্যৰ বিভিন্ন প্ৰান্তত ৰাইজে অখিল মুক্তিৰ বাবে আইনী প্ৰক্ৰিয়া সমাপন কৰিবলৈ বৰঙণি প্ৰদান কৰি আহিছে৷ কৃষক মুক্তি সংগ্রাম সমিতিৰ নেতা অখিল গগৈৰ মুক্তি বাবে আইনী প্ৰক্ৰিয়াত সহায়ৰ বাবে দৰং জিলা কৃষক মুক্তি সংগ্ৰাম সমিতি, দৰং জিলা ছাত্ৰ মুক্তি সংগ্ৰাম সমিতি আৰু অবিভক্ত ওদালগুৰি জিলাৰ কৃষক মুক্তি সংগ্ৰাম সমিতিয়ে ঘৰে ঘৰে দান বৰঙণি সংগ্ৰহ কৰা পৰিলক্ষিত হৈছে৷

দৰং জিলাৰ বিভিন্ন গাঁৱত ঘৰে ঘৰে বৰঙণি সংগ্ৰহ কৰাত সকলো লোকে নিজ ইচ্ছাৰে মুক্তহস্তে দান কৰা বুলি কয় কৃষক মুক্তিৰ স্থানীয় সমিতিয়ে৷ সমাজৰ অতি দৰিদ্ৰ লোকেও নিজ সদিচ্ছাৰে সাঁচতীয়া ধন আগবঢ়াই। নাগৰিকত্ব সংশোধনী আইন বিৰোধী শক্তি আৰু অসমৰ আঞ্চলিক শক্তি সকলো একেলগ হৈ সাম্প্ৰদায়িক শক্তিৰ বিৰুদ্ধে যুঁজি অসমক বচাবলৈ বদ্ধপৰিকৰ বুলি কয় দৰং জিলা কৃষক মুক্তি সংগ্ৰাম সমিতিয়ে৷