ডিজিটেল ডেস্কঃ দেশৰ ১০ জন ধনী সাংসদৰ তালিকাত স্থান লাভ কৰিছে ধুবুৰী লোকসভা সমষ্টিৰ সাংসদ বদৰুদ্দিন আজমলে৷ সুগন্ধি ব্যৱসায়েৰে জড়িত আজমলৰ সম্পত্তিৰ পৰিমাণ কিমান সেয়া অস্পষ্ট যদিও দেশৰ ১০ জন ধনী সাংসদৰ ভিতৰত এজন হৈছে আজমল৷ মাত্ৰ ১০ বছৰৰ ভিতৰত সৰ্বাধিক সম্পত্তি বৃদ্ধি পোৱা দেশৰ শীৰ্ষ ১০জন চহকী সাংসদৰ তালিকাত স্থান লাভ আজমলৰ৷ সাংসদ বদৰুদ্দিন আজমলৰ ১০ বছৰৰ ব্যৱধানত ১৬০ শতাংশ পৰ্যন্ত সম্পত্তি বৃদ্ধি পাইছে৷ এই তথ্য প্ৰকাশ কৰিছে এছ’চিয়েশ্বন ফৰ ডেম’ক্ৰেটিক ৰিফৰ্ম চমুকৈ এডিআৰ নামৰ সংস্থাটোৰ সমীক্ষাত৷ এডিআৰে প্ৰকাশ কৰা প্ৰতিবেদনত তিনিবাৰ একেৰাহে জয়ী হোৱা দেশৰ শীৰ্ষ ১০ ধনী সাংসদৰ তালিকাত ৮ নম্বৰত আছে অসমৰ সাংসদ বদৰুদ্দিন আজমল৷ ২০০৯ চনত জয় লাভ কৰাৰ সময়ত সাংসদ আজমলৰ স্থাৱৰ-অস্থাৱৰ সম্পত্তিৰ পৰিমাণ আছিল ৩০.৩৫ কোটি টকা৷ কিন্তু ২০১৯ চনত এআইউডিএফ দলৰ মুৰব্বীজনৰ সম্পত্তিৰ পৰিমাণ ৭৮.৮০ কোটি টকালৈ বৃদ্ধি পায়৷ উক্ত ১০ বছৰত আজমলৰ মুঠ সম্পত্তি বৃদ্ধিৰ পৰিমাণ হৈছে ৪৮.৪৫ কোটি টকা৷ উল্লেখ্য যে এডিআৰে ২০০৯ চনৰ পৰা ২০১৯ চনলৈ একেৰাহে তিনিবাৰকৈ লোকসভাৰ সাংসদ হিচাপে জয় লাভ কৰা দেশৰ ৭১জন সাংসদৰ সম্পত্তিৰ তথ্য প্ৰকাশ কৰিছে৷ মাত্ৰ তিনিটা কাৰ্যকালত অৰ্থাৎ ১০ বছৰৰ ব্যৱধানত ৭১জন সাংসদৰ সম্পত্তি গড়ে ২৮৬ শতাংশ পৰ্যন্ত বৃদ্ধি পাইছে৷ ৷ এডিআৰৰ প্ৰতিবেদনত প্ৰকাশ পোৱা মতে ৭১জন পুনৰ নিৰ্বাচিত সাংসদৰ ২০০৯ চনত গড় সম্পত্তি আছিল ৬.১৫ কোটি টকা৷ ২০১৯ত নিৰ্বাচিত হোৱাৰ পাছত এই ৭১জন সাংসদৰ গড় সম্পত্তি ২৩.৭৫ কোটি টকা লৈ বৃদ্ধি পায়৷ এইসকল সাংসদৰ শীৰ্ষত আছে বিজেপিৰ ছয়জন সাংসদ৷ এন চি পি, শিৰোমণি আকালি দল, বিজেডি আৰু এ আই ইউ ডি এফৰ পৰা এজনকৈ সাংসদ শীৰ্ষ দহৰ ভিতৰত আছে৷