গুৱাহাটীঃ এইবাৰ দিল্লী আৰক্ষীৰ বিশেষ শাখাই গ্ৰেপ্তাৰ কৰি অসমৰ পৰা দিল্লীলৈ নিলে অসম বিদ্বেষী মন্তব্য প্ৰকাশ কৰি গুৱাহাটী কেন্দ্ৰীয় কাৰাগাৰত বন্দী চাৰ্জিল ইমামক৷ মঙলবাৰে চাৰ্জিল ইমামক দিল্লী আৰক্ষীৰ বিশেষ শাখাই অসমৰ পৰা দিল্লীলৈ নিয়া বুলি জানিব পৰা গৈছে৷ কাৰাগাৰত আৱদ্ধ চাৰ্জিলক অসমলৈ অনা হৈছিল তদন্তৰ খাতিৰত৷ অসম তথা উত্তৰ-পূৰ্বাঞ্চলক ভাৰতৰ পৰা বিচ্ছিন্ন কৰাৰ সপক্ষে মন্তব্য প্ৰকাশ কৰা চাৰ্জিল ইমামক ২০ ফেবুৰাৱীত অসম আৰক্ষীয়ে অসমলৈ আনিছিল৷

ফেব্ৰুৱাৰিত মাহত দিল্লীত সাব্যস্ত কৰা নাগৰিকত্ব সংশোধনী আইন বিৰোধী প্ৰতিবাদত অংশ লৈ জৱাহৰলাল নেহৰু বিশ্ববিদ্যালয়ৰ গৱেষক ছাত্ৰ চাৰ্জিল ইমামৰ বিৰুদ্ধে অসম তথা উত্তৰ-পূৰ্বাঞ্চলক বিচ্ছিন্ন কৰাৰ কথা কোৱাৰ লগতে দিল্লীত সংঘটিত সংঘৰ্ষত জড়িত থকাৰ অভিযোগ উঠি আহিছিল৷ এইবাৰ ইউএপিএৰ অধীনত মঙলবাৰে দিল্লী আৰক্ষীৰ বিশেষ শাখাই অসমৰ কাৰাগাৰত গ্ৰেপ্তাৰ কৰে ইমামক। দিল্লী আৰক্ষীয়ে এক অভিযোগনামাত চাৰ্জিলৰ বিৰুদ্ধে দেশদ্ৰোহৰ কাণ্ডত জৰিত থকাৰ অভিযোগ উত্থাপন কৰিছিল।

জামিয়া-মিলিয়া ইছলামীয়া বিশ্ববিদ্যালয়ত নাগৰিকত্ব সংশোধনী আইন বিৰোধী আন্দোলনথলীত উপস্থিত থাকি ইমামে উত্তৰ-পূৰ্বাঞ্চলক ভাৰতৰ পৰা বিচ্ছিন্ন কৰাৰ মন্তব্য প্ৰকাশ কৰাত ২৮ জানুৱাৰীত ইমামক গ্ৰেপ্তাৰ কৰিছিল দিল্লী আৰক্ষীয়ে৷ গুৱাহাটীৰ কাৰাগাৰত ২২ জুলাইত ক’ৰোনা পজিটিভ ধৰা পৰিছিল চাৰ্জিল ইমাম৷