জোনমণি বেগম, বিশ্বনাথঃ বিশ্বনাথ জিলাত ইজনৰ পিছত সিজন লোক আক্ৰান্ত হৈছে কোৱিড-১৯ত৷ গুৱাহাটীৰ পৰা বিশ্বনাথ ঘৰলৈ গৈ সংক্ৰমণ বৃদ্ধি কৰা বিজয় শংকৰ দাসৰ নামৰ বেংক কৰ্মচাৰীগৰাকীৰ চুলিকটা নাপিত সঞ্জীৱ ঠাকুৰৰ সংস্পৰ্শলৈ কেইবাগৰাকী লোক ক’ৰোনা পজিটিভ ধৰা পৰিছে৷ নাপিত সঞ্জীৱৰ পৰিয়ালৰ লগতে তেওঁৰ সংস্পৰ্শত অহা এগৰাকী ৮০ বছৰীয়া বৃদ্ধা, শিশু আৰু এগৰাকী গৰ্ভৱতী মহিলাও আক্ৰান্ত হৈছে৷

যোৱা ২৪ ঘণ্টাত নতুনকৈ ১৪ জন আক্ৰান্ত হোৱাৰ পিছতে সোমবাৰৰ নিশাৰ পৰাই বিশ্বনাথ চাৰিআলি প্ৰশাসন তৎপৰ হৈ পৰিছে৷ সোমবাৰে নিশা বিশ্বনাথৰ বালিপুখুৰীৰ ৬ জন সেনা জোৱান, এখন ব্যক্তিগত নাৰ্চিং হোমৰ এগৰাকী নাৰ্চ আৰু এজন মোবাইল দোকানী ধৰা পৰিছে৷

আনহাতে নাপিত সঞ্জীৱ ঠাকুৰৰ সংস্পৰ্শলৈ অহাত ক’ৰোনাত আক্ৰান্ত হয় মিকি শৰ্মা (১৪), সুলেখা শৰ্মা(৪০), আয়ুস শৰ্মা(১৮), কুন্দন ঠাকুৰ (৬) প্ৰিয়ংকা শৰ্মা(২৫), সাধন দেবী (২৭), হৰি প্ৰসাদ ঠাকুৰ (৮৫), পাৰ্ৱতী দেবী (৮০), দিপ্তী শৰ্মা (১০), বীৰেন্দ্ৰ প্ৰসাদ শৰ্মা(৫৬), দোকানী সঞ্জয় প্ৰসাদ, (৩৬) দেবেন্দ্ৰ কুমাৰ (৩৫), মোবাইল দোকানী ৰোহিত জৈন (৩৭), আৰু জুলেখা বাৰ্লা (২৬)। আটাইকেইজন ক’ৰোনা পজিটিভ ৰোগীক স্বাস্থ্য বিভাগে ১০৮ এম্বুলেন্সেৰে বিশ্বনাথৰ বালিচাং চিকিৎসালয়ত ভৰ্তি কৰে৷

দায়িত্বজ্ঞানহীন ভাৱে এগৰাকী বেংক কৰ্মচাৰীয়ে গুৱাহাটীৰ পৰা বিশ্বনাথৰ ঘৰলৈ গৈ ইফাল-সিফাল ঘূৰি পুনৰ গুৱাহাটীলৈ ঘূৰি অহাৰ পিছতে হাহাকাৰ লাগিছে বিশ্বনাথত৷ গুৱাহাটীলৈ অহাৰ পিছতে বেংক কৰ্মচাৰীগৰাকী ক’ৰোনা পজিটিভ পোৱাৰ লগতে বিশ্বনাথত কৰ্মচাৰীগৰাকীৰ সংস্পৰ্শত অহা কেইবাগৰাকী লোক ইতিমধ্যে পজিটিভ পোৱাৰ লগতে পুনৰ এইসকল লোকক পজিটিভ পোৱা গৈছে৷

বেংক বিষয়া বিজয় শংকৰ দাসৰ সংস্পৰ্শলৈ অহা চাৰিজনকৈ লোক যোৱা ২৬ জুনত পজিটিভ ধৰা পৰিছিল৷ বিজয় শংকৰ দাস বিশ্বনাথস্থিত ঘৰৰ ৩জন লোকৰ লগতে দাসৰ গাড়ী চাৰ্ভিচিং কৰা এজন মেকানিকৰ দেহত পজিটিভ পোৱা গৈছিল৷ এই খবৰে বিশ্বনাথৰ জৱসাধৰণক চিন্তিত কৰিছে৷ প্ৰশাসনে দাসৰ সংস্পৰ্শত অহা লোকক চিনাক্ত কৰি কোৱাৰাণ্টাইন কৰাৰ ব্যৱস্থা কৰিছে যদিও সংক্ৰমণ বৃদ্ধি পায়৷

গুৱাহাটীৰ পৰা বিশ্বনাথ চাৰিআলিৰ শান্তিপুৰৰ ঘৰলৈ গৈছিল বেংক কৰ্মচাৰীগৰাকী৷ গুৱাহাটীলৈ অহাৰ পিছতে ক’ৰোনাৰ নমুনা পৰীক্ষাত পজিটিভ পোৱাৰ পিছতে হাঁহাকাৰ লাগে স্বাস্থ্য বিভাগ তথা জিলা প্ৰশাসনৰ।

বেংক কৰ্মচাৰীগৰাকীয়ে চেলুনত চুলি কটাৰ লগতে, মিঠাইৰ দোকান, কাপুৰৰ দোকান, পূজাত অংশ লোৱাৰ লগতে ই-ৰিক্সাত ভ্ৰমণ কৰিছিল৷

বিজয় শংকৰ দাসে বিশ্বনাথ চাৰিআলিৰ আমবাৰীস্থিত চেলুনত চুলি কটাৰ লগতে ই ৰিক্সাত ঘৰলৈ আহিছিল। ছানৰাইজ নামৰ ক্লাৱে আয়োজন কৰা কালি পূজাত অংশ লৈছিল৷ কিতাপৰ দোকান ‘বিচিত্ৰা’, আন কেইবাখনো কাপোৰৰ দোকান, মিষ্টিমুখ নামৰ এখন মিঠাই দোকানলৈও গৈছিল দাস৷ গুৱাহাটীলৈ অহাৰ পিছত বেমাৰত আক্ৰান্ত দাসৰ নমুনা পৰীক্ষা কৰাত পজিটিভ পোৱা গৈছিল৷