গুৱাহাটীঃ অত্যাৱশ্যাকীয় সামগ্ৰীৰ লগতে পেট্ৰ’ল-ডিজেলৰ দাম বৃদ্ধিৰ প্ৰতিবাদত আজি প্ৰদেশ কংগ্ৰেছে ৰাজীৱ ভৱনত অৱস্থান ধৰ্মঘট পালন কৰে। প্ৰাক্তন মুখ্যমন্ত্ৰী তৰুণ গগৈৰ নেতৃত্বত প্ৰদেশ কংগ্ৰেছৰ একাংশ নেতা-কৰ্মীয়ে ৰাজীৱ ভৱনত আজি পেট্ৰ’ল-ডিজেলৰ মূল্যবৃদ্ধিৰ বিৰুদ্ধে ধৰ্ণা দিয়াও পৰিলক্ষিত হয়।

প্ৰাক্তন মুখ্যমন্ত্ৰী গগৈয়ে কয় যে চৰকাৰখনে সাধাৰণ মানুহৰ দুখৰ বোজা পাতল কৰাৰ পৰিৱৰ্তে নতুনকৈ দাম বৃদ্ধিৰ দৰে সিদ্ধান্তৰে ৰাম টাঙোনহে শোধাইছে। সকলো বস্তুৰে দাম বৃদ্ধি কৰি চৰকাৰে মানুহ বিপদত পৰাৰ সময়ত সহায়ৰ পৰিৱৰ্তে পেটত গামোচা বান্ধিবলগীয়া হোৱা পৰ্যায়লৈ লৈ গৈছে।

গগৈয়ে কয়, ‘ৰাজ্যৰ য’তে-ততে টোলগেট স্থাপন কৰা হৈছে। ৰাস্তা-পদূলি সম্পূৰ্ণ নোহোৱাকৈ অতিৰিক্তভাৱে মানুহৰ পৰা কৰ সংগ্ৰহ কৰি চৰকাৰে নিজৰ জনবিৰোধী চৰিত্ৰ উদঙাই দিছে।’

প্ৰদেশ কংগ্ৰেছৰ সভাপতি ৰিপুণ বৰাকে প্ৰমুখ্য কৰি কেবাজনো জ্যেষ্ঠ নেতা উপস্থিত থকা প্ৰতিবাদী সভাখনত বিজেপি চৰকাৰ হায় হায়, মূল্যবৃদ্ধি ৰোধ কৰক, চীনৰ পৰা ভাৰতক ৰক্ষা কৰক আদি ধ্বনি দিয়াৰ লগতে ৰাইজক বিজেপিৰ বিৰুদ্ধে প্ৰতিবাদ কৰিবলৈ আহ্বান জনায়। প্ৰদেশ কংগ্ৰেছৰ সভাপতি ৰিপুণ বৰাই পেট্ৰ’ল-ডিজেলৰ দামবৃদ্ধিৰ দৰে চৰকাৰী সিদ্ধান্তক হঠকাৰী কাৰ্য বুলিও অভিহিত কৰে।