জয়ন্ত মুদৈ, বেবেজীয়াঃ শতবৰ্ষ গৰকা নগাঁও জিলাৰ অন্যতম পুৰণি স্বাস্থ্য কেন্দ্ৰ জাজৰি ৰাজ্যিক চিকিৎসালয়ৰ অধীনত বুঢ়াগোঁহাই থান খণ্ড প্ৰাথমিক স্বাস্থ্যকেন্দ্ৰৰ সহযোগত বুধবাৰে দক্ষিণ জাজৰিত এটি স্বাস্থ্য পৰীক্ষা আৰু সজাগতা সভা সম্পন্ন হয়। স্থানীয় সমাজকৰ্মী থগিত মহন্তৰ সভাপতিত্বত হোৱা সজাগতা সভাখন অনুষ্ঠিত হয় দক্ষিণ জাজৰি শ্ৰীমন্ত শংকৰ মন্দিৰ ৰাজহুৱা প্ৰেক্ষাগৃহত। জাজৰি ৰাজ্যিক চিকিৎসালয়ৰ কৰ্মচাৰী জয়ন্ত ভূঞাই উদ্দেশ্য ব্যাখ্যা কৰা সজাগতা সভাখনত ‘ৰক্তহীনতা মুক্ত ভাৰত’ শীৰ্ষক বিষয়ৰ ওপৰত বক্তব্য ৰাখে ডা০ সেউজ সেনাপতি, ড্ৰাগছৰ ভয়াবহতাৰ ওপৰত বক্তব্য ৰাখে দলংঘাট সংহত শিশু উন্নয়ন প্ৰকল্পৰ প্ৰকল্প বিষয়া ধৰিত্রী ৰংপি, ক’ভিড ভেকচিনৰ ওপৰত আলোকপাত কৰে বুঢ়াগোহাই খণ্ড আঁচনি প্ৰৱন্ধক আবু খেৰে আৰু পৰিয়াল পৰিকল্পনাৰ ওপৰত আলোকপাত কৰে বি চি এম বাবু মনি শইকীয়াই। সজাগতা সভাত বিশিষ্ট অতিথিৰ ভাষণ ৰাখে জাজৰি প্ৰেছ ক্লাৱৰ সম্পাদক ৰাহুল দে‍ৱ বৰদলৈ আৰু চি এইছ অ’ নিকিতা হাজৰিকাই। সভাত পাঁচ গৰাকী সচেতন মাতৃক সম্বৰ্ধনা জনোৱা হয় ৷ ইফালে, সজাগতা সভাৰ লগতে এটি স্বাস্থ্য পৰীক্ষা শিবিৰ অনুষ্ঠিত হয়। শিবিৰত প্ৰায় ডেৰ শতাধিক ৰোগীক স্বাস্থ্য পৰীক্ষা আৰু ঔষধ বিতৰণ কৰে ডাঃ হবিবুৰ ৰহমান, ডা০ সেউজ সেনাপতি, ডা০ ৰেকিব কেদুৱাই আৰু ডা০ গংগোত্রী পাঠকে। শিবিৰত জাজৰি ৰাজ্যিক চিকিৎসালয়ৰ কৰ্মচাৰী, আশা কৰ্মী আৰু অংগনবাদী কৰ্মী সকলে সহযোগ কৰে।