বোকাখাতঃ অসমীয়াত এষাৰ কথা আছে৷ চোৰ গলে বুদ্ধি, বৰষুণ গলে জাপী৷ বৰষুণ গলে জাপিৰ অৰ্থ থাকে জানো৷ তেনেই হৈছে অগপৰ সভাপতি তথা ৰাজ্যৰ কেবিনেট মন্ত্ৰী অতুল বৰাৰ ক্ষেত্ৰত৷ সম্পূৰ্ণ লক-ডাউন কাৰ্যকৰী হোৱাৰে পৰা যোৱা তিনিমাহে কচু, ঢেঁকীয়াৰে ভাত খাজ খাই জীয়াই থকা পৰিয়ালক এতিয়াহে সাহায্য বিতৰণ কৰিব যোৱাত ৰাইজে উক্ত আপ্ত বাক্যশাৰীকে মনত পেলাই দিয়ে অতুল বৰাক৷ যোৱা তিনিমাহে ক’ত আছিলা বুলি প্ৰশ্ন উত্থাপন কৰাত সাহায্য বিতৰণ কৰিব এৰি পলায়ন কৰিব লগা হয়৷ এই কাণ্ড সংঘটিত হৈছে খোদ মন্ত্ৰী অতুল বৰাৰ সমষ্টি বোকাখাতত৷

‘বৰষুণ যোৱাৰ পিছত জাপি’ যোগানৰ দৰে জনসাধাৰণৰ মাজত তিনিমাহৰ অন্তত সাহায্য বিতৰণ কৰিবলৈ গৈ নিজৰ সমষ্টিতে ৰাইজৰ ৰোষত পৰিল বোকাখাতৰ বিধায়ক কৃষিমন্ত্ৰী অতুল৷ ১৫ জুনৰ বিয়লি বোকাখাতৰ বালিজানৰ মুৰংঘৰত ৰাইজৰ মাজত সাহায্য বিতৰণ কৰিবলৈ উপস্থিত হয় মন্ত্ৰী অতুল৷ উক্ত সময়তে মন্ত্ৰীগৰাকীক ৰাইজে ঘেৰি ধৰি তিনিমাহে ক’ত আছিলা বুলি প্ৰশ্নৰ পিছত প্ৰশ্ন কৰিবলৈ ধৰে৷ প্ৰশ্ন পুৰুষে কৰা নাছিল প্ৰশ্ন কৰিছিল নাৰী সমাজে৷ নাৰী সমাজৰ প্ৰশ্নৰ উত্তৰ দিব নোৱাৰি ততাতৈয়াকৈ গাড়ীত উঠি পালায়নয় কৰে মন্ত্ৰী অতুলে৷ লাজে-অপমানে সাহায্য বিতৰণ নকৰাকৈয়ে বালিজান গাঁৱৰ পৰা উভতি আহে অগপৰ সভাপতি অতুল বৰা৷

নিজৰ সমষ্টি বোকাখাত এনে পৰিস্থিতিৰ সন্মুখীন হোৱাৰ ঘটনাই চাঞ্চল্যৰ সৃষ্টি কৰিছে৷ বিগত আঢ়ৈ মাহেই দেশত লক-ডাউন চলি থকাৰ মূৰকত অতুল বৰাই এতিয়াহে সাহায্য দিবলৈ সময় পালে নেকি বুলি স্থানীয় লোকে উভতি ধৰে৷

ইপিনে আন কেইবাটাও বিষয়ৰ উত্তৰ বিচাৰে ৰাইজে৷ বোকাখাতৰ মাজ মজিয়াত সংঘটিত বোধেশ্বৰী পেগু, মাইটি পেগু, নমিতা দলে অথবা মুনু ডেকাৰ হত্যাকাণ্ডৰ বিচাৰ, মাটিৰ পট্টা দিম বুলি দিয়া প্ৰতিশ্ৰুতি, লক-ডাউনৰ মাজত ৰাইজৰ সাহায্যৰ বাবে অনা কাজিৰঙা সমবায় সমিতিৰ ৯০০ কুইণ্টল চাউল হৰলুকি আদিৰ বিষয় উত্থাপন কৰাত অতুল বৰা মৌন হৈ থাকিব লগা হয়৷ প্ৰশ্ন সমূহৰ সঠিক উত্তৰ দিব নোৱাৰা অতুল বৰাক বালিজানত সাহায্য বিতৰণ কৰিবলৈ দিয়া নহ’ব বুলি ৰাইজে স্পষ্ট কৰে৷ অতুল বৰাই উক্ত স্থানৰ পৰা আঁতৰি যাবলৈ ধৰোতে একাংশ লোকে মোবাইলেৰে ভিডিঅ’ কৰিবলৈ লোৱাত মন্ত্ৰীৰ দেহৰক্ষীয়ে বাধা প্ৰদান কৰে৷ যাৰ বাবে উপস্থিত লোকসকল ক্ষোভিত হৈ পৰে৷ পৰিস্থিতি উত্তপ্ত হৈ পৰাত মন্ত্ৰী অতুল বৰাই ঘটনাস্থলীৰ পৰা আঁতৰিবলৈ বাধ্য হয়৷

ইফালে ১৫ জুনৰ এই ঘটনাৰ সন্দৰ্ভত প্ৰকাশ কৰা এক বিবৃতিত বোকাখাত বিধায়ক অতুল বৰা সাংঘাটিক ভাৱে হতাশগ্ৰস্ত হৈ ৰাইজৰ সমূখত মূৰ থিয় কৰি কথা কোৱাৰ নৈতিক সাহস হেৰুৱাইছে বুলি মন্তব্য কৰিছে জীপাল কৃষক-শ্ৰমিক সংঘৰ সম্পাদক প্ৰবীণ পেগু আৰু জিলা সমন্বয়ক মনিকংকনা বৰবৰাই৷ বিবৃতিটোৰ মতে মন্ত্ৰী অতুল বৰাই ইতিমধ্যে ভৰিৰ তলৰ মাটি হেৰুৱাইছে৷ যাৰ বাবে সাহায্য বিতৰণৰ সময়তো পুলিচ চিপাহীৰ আৱেষ্টনিৰ সহায় ল’ব লগা হৈছে৷