জয়ন্ত মুদৈ, বেবেজীয়াঃ নগাঁও জিলাৰ জাজৰি আৰক্ষী থানা এলেকাৰ কুৰুৱাবাহীত বৃহস্পতিবাৰে পুখুৰীত এজন যুৱকৰ মৃতদেহ উদ্ধাৰ হোৱাৰ ঘটনাই চাঞ্চল্যৰ সৃষ্টি কৰিছে৷ মৃতদেহটো কুৰুৱাবাহীৰ নেত্ৰ কমল হাজৰিকাৰ (৩৮) বুলি চিনাক্ত কৰা হৈছে৷

জানিব পৰা মতে, বিগত তিনিদিন ধৰি সন্ধানহীন হৈ আছিল যুৱকজন৷ পৰিয়ালৰ লোকে সকলো ঠাইতে বিচাৰ-খোচাৰ কৰি যুৱকজনৰ কোনো শুং-সূত্ৰ উদ্ধাৰ কৰিব পৰা নাছিল৷

কিন্তু বৃহস্পতিবাৰে একেটা অঞ্চলৰ পথাৰৰ এটা পুখুৰীত প্ৰত্যক্ষ কৰে নিৰুদ্দিষ্ট যুৱকজনৰ মৃতদেহ। ভাস্কৰ বৰা নামৰ লোকজনৰ পুখুৰীত একাংশ লোকে মৃতদেহ প্ৰত্যক্ষ কৰাত হুৱা-দুৱা লাগে৷ জাজৰি আৰক্ষীক খবৰ দিয়াত আৰক্ষী ঘটনাস্থলীত উপস্থিত হৈ মৃতদেহ মৰণোত্তৰ পৰীক্ষাৰ বাবে নগাঁও ভোগেশ্বৰী ফুকননী অসামৰিক চিকিৎসালয়লৈ প্ৰেৰণ কৰে৷

ইফালে, তিনিদিন ধৰি সন্ধানহীন হৈ থকা যুৱকজনৰ মৃতদেহ পুখুৰীত উদ্ধাৰ হোৱা ঘটনাক লৈ ৰহস্যৰ সৃষ্টি হৈছে৷ স্থানীয় ৰাইজৰ একাংশই এয়া আত্মহত্যাৰ ঘটনা বুলি ক’লেও আন একাংশই যুৱকজনক কোনো দুৰ্বৃত্তই পৰিকল্পিতভাবে হত্যা কৰি আত্মহত্যাৰ ৰূপ দিবলৈ এনেদৰে পুখুৰীত পেলাই থৈ যোৱা বুলি সন্দেহ প্ৰকাশ কৰিছে৷ অৱশ্যে মৃতদেহৰ মৰণোত্তৰ পৰীক্ষাৰ পিছত আৰক্ষীৰ সঠিক তদন্তত প্ৰকৃত সত্য পোহৰলৈ আহিব৷ সৰবৰহী যুৱকজনৰ অকাল মৃত্যুত গভীৰ শোকৰ ছাঁ পৰে।