ডিজিটেল ডেস্কঃ বলিউদৰ অভিনেতা সুশান্ত সিং ৰাজপুতৰ মৃত্যু কাণ্ডৰ প্ৰধান অভিযুক্ত সুশান্তৰ প্ৰেয়সী অভিনেত্ৰী ৰিয়া চক্ৰৱৰ্তীক চিবিআই-এ তৃতীয় বাৰৰ বাবে সোধ-পোছ কৰিলে৷ দেওবাৰ (৩০ আগষ্ট) পৰ্যন্ত একেলগে তৃতীয়বাৰৰ বাবে সোধ-পোছ কৰিছে ৰিয়া চক্ৰৱৰ্তীক৷ দেওবাৰে ৮ ঘণ্টা সোধ-পোছ কৰিছে ৰিয়াক৷
ইয়াৰ পূৰ্বে শুকুৰবাৰে (২৮ আগষ্ট) ১০ ঘণ্টা আৰু শনিবাৰে (২৯ আগষ্ট) ৭ ঘণ্টা সোধ-পোছ কৰিছে৷ মুম্বাইস্থিত ডিআৰডিঅ’ৰ অতিথিশালত চিবিআই-এ সোধ-পোছ অব্যাহত ৰাখিছে ৰিয়াক৷

তদন্তকাৰী সংস্থা চিবিআই-এ এইটো অতিথিশালাত বাহৰ পাতিছে৷ ৰিয়াক পুনৰ তলৱ কৰি সোমবাৰে উপস্থিত হ’বলৈ নিৰ্দেশ দিছে৷ তদ্ৰুপ ৰিয়াৰ ভাতৃ চৌবিক চক্ৰৱৰ্তীক চতুৰ্থ দিনৰ বাবে সোধ-পোছ কৰিছে চিবিআই-এ৷ মুম্বাইস্থিত চাণ্টাক্ৰুজ কলনিৰ পৰা পুৱা ১০ বাজি ৩০ মিনিটত ৰিয়া আৰু ভাতৃ চৌবিক উপস্থিত হয় ডিআৰডিঅ’ৰ অতিথিশালাত৷ মুম্বাই আৰক্ষীৰ এটা দলে ৰিয়াৰ বাহনক সুৰক্ষা দিয়াৰ লগতে কলনিত সুৰক্ষাৰ ব্যৱস্থা কৰিছে৷ চিবিআই-এ বিগত তিনি দিনত ২৬ ঘণ্টা সোধ-পোছ কৰিছে ৰিয়াক৷

চিবিআইৰ আৰ্জিৰ ভিত্তিত অৱশেষত মুম্বাই আৰক্ষীয়ে সুৰক্ষা প্ৰদান কৰিলে অভিনেত্ৰী ৰিয়া চক্ৰৱৰ্তীক৷ প্ৰাণৰ প্ৰতি সংশয় অহা বুলি দাবী কৰি মুম্বাই আৰক্ষীৰ কাষ চাপি এখন পত্ৰ প্ৰদান কৰি নিৰাপত্তা বিচাৰিছিল৷ বিশেষকৈ সাংবাদিকৰ বিৰুদ্ধে ক্ষোভ জাহিৰ কৰি ৰিয়াই মুম্বাই আৰক্ষীৰ পৰা নিৰাপত্তা বিচাৰিছিল৷ তাৰ পিছতে চিবিআই-এ মুম্বাই আৰক্ষীক ৰিয়াক নিৰাপত্তা দিবলৈ আহ্বান জনাইছিল৷ আজি পুনৰ চিবিআইৰ ওচৰত সোধ-পোছৰ বাবে উপস্থিত হৈছে ৰিয়া৷ ঘৰৰ পৰা ওলোৱাৰ সময়তে ৰিয়াৰ ঘৰ আৰু ফ্লেটৰ গেটত নিৰাপত্তাৰক্ষী নিয়োগ কৰে মুম্বাই আৰক্ষীয়ে৷

সুশান্ত সিং ৰাজপুত গোচৰৰ তদন্ত কৰি থকা কেন্দ্ৰীয় তদন্তকাৰী সংস্থা চিবিআই-এ সুশান্তৰ কেইবাগৰাকী বন্ধুসহ প্ৰেয়সী ৰিয়া চক্ৰৱৰ্তীক সোধ-পোছ কৰি গৈছে৷ চিবিআয়ে তদন্ত আৰম্ভ কৰি ২৮ আগষ্টত ৰিয়াৰ ভাতৃ চৌবিক চক্ৰৱৰ্তীক প্ৰথম দীৰ্ঘ সময় সোধ-পোছ কৰিছিল৷

উল্লেখ্য যে, জনপ্ৰিয় অভিনেতা সুশান্ত ৰাজপুটৰ আত্মহত্যাৰ ঘটনাৰ প্ৰায় ২ মাহৰ অন্তত বিহাৰৰ এখন আৰক্ষী থানাত পিতৃয়ে এজাহাৰ দাখিল কৰিছিল সুশান্তৰ প্ৰেয়সী অভিনেত্ৰী ৰিয়া চক্ৰৱৰ্তীৰ বিৰুদ্ধে৷ ৰিয়া চক্ৰৱৰ্তীৰ বিৰুদ্ধে কেইবাটাও গুৰুতৰ অভিযোগ উত্থাপন কৰি উচিত তদন্তৰ দাবী কৰিছে সুশান্তৰ পিতৃ কে কে সিঙে৷ ২৫ জুলাইত গোপনে পাটনাৰ এখন থানালৈ গৈ এজাহাৰ দাখিল কৰে কে কে সিঙে৷ সুশান্তৰ পিতৃয়ে এজাহাৰ দাখিল কৰাৰ পিছতে ৰিয়া চক্ৰৱৰ্তীয়ে উচ্চতম ন্যায়ালয়ত আৰ্জি দি গোচৰৰ তদন্ত মুম্বাইত কৰিবলৈ আৰু গোচৰ মুম্বাইলৈ বদলি কৰিবলৈ আহ্বান জনাইছিল৷

আত্মহত্যা কাণ্ডৰ তদন্ত চিবিআইক প্ৰদান কৰিবলৈ দাবী উত্থাপন হৈ আহিছে যদিও পৰিয়ালে এই দাবী উত্থাপন কৰা নাছিল৷ পিছত পৰিয়ালে চিবিআই তদন্ত দাবী কৰাত কেন্দ্ৰীয় চৰকাৰে গোচৰৰ তদন্তৰ দায়িত্ব চিবিআইক প্ৰদান কৰিছে৷ মুম্বাই আৰক্ষীয়ে সুশান্তৰ মৃত্যু কাণ্ডৰ তদন্ত কৰি আছিল যদিও মুম্বাই আৰক্ষীয়ে তদন্ত সঠিক ভাৱে নকৰাৰ অভিযোগ উত্থাপন কৰি বিহাৰৰ পাটনাৰ ৰাজীৱ নগৰ আৰক্ষী থানাত তিনি পৃষ্ঠাৰ এজাহাৰ দাখিল কৰিছিল৷ এজাহাৰৰ ভিত্তিত বিহাৰ আৰক্ষীৰ এটা দল অভিনেত্ৰী ৰিয়াক সোধ-পোছৰ বাবে মুম্বাইত উপস্থিত হয় যদিও বৃহ মুম্বাই নগৰপালিকাই পাটনী আৰক্ষীৰ দলক কোৱাৰাণ্টাইন কৰিছিল৷

সুশান্ত সিঙৰ পিতৃ কে কে সিঙে এজাহাৰ দাখিল কৰাৰ পিছতে ঘটনাই নতুন মোৰ লয়৷ এজাহাত সুশান্তৰ প্ৰেমিকা ৰিয়া চক্ৰৱৰ্তীৰ বিৰুদ্ধে সুশান্তৰ পৰা অৰ্থ আদায় কৰা, কামত বাধা দিয়া, পৰিয়ালৰ পৰা দূৰত ৰখা আৰু শেষত সুশান্তৰ সৈতে সম্পৰ্ক ছেদ কৰাৰ অভিযোগ উত্থাপন কৰে৷ আত্মহত্যা কাণ্ডৰ তদন্ত বিহাৰ আৰক্ষীৰ দ্বাৰা কৰিবলৈ দাবী জনাইছিল সুশান্তৰ পৰিয়ালে৷

সুশান্তৰ মৃত্যুৰ দুমাহ পাৰ হৈ গৈছে আৰু এই পৰ্যন্ত ৩৬গৰাকী লোকক সোধ-পোছ কৰিছে৷ যোৱা ১৪ জুনত সুশান্তৰ মৃতদেহ মুম্বাইৰ বান্দ্ৰাস্থিত ঘৰত উদ্ধাৰ হৈছিল৷ সুশান্তে চিপ লৈ আত্মহত্যা কৰা বুলি প্ৰচাৰ হয় যদিও একাংশ লোকে হত্যাৰ অভিযোগে উত্থাপন কৰি আহিছে৷