গুৱাহাটীঃ লক-ডাউন শিথিল কৰাৰ পিছৰে পৰা অসমত দ্ৰুত গতিত বৃদ্ধি হৈছে ক’ৰোনা ৰোগীৰ সংখ্যা৷ দেশৰ প্ৰতিখন ৰাজ্যৰ দৰেই অসমত ৰোগীৰ সংখ্যা দ্ৰুত গতিত বৃদ্ধি হোৱাত অসম চৰকাৰ পৰিস্থিতিৰ সৈতে মোকাবিলা কৰিবলৈ উঠি-পৰি লাগিছে৷ অসমত ক’ৰোনা ৰোগীৰ সংখ্যা ৩ হাজাৰ হও হও৷ ক’ৰোনা আক্ৰান্ত ৰোগীৰ সংখ্যা প্ৰতি ঘণ্টাত বাঢ়ি অহাৰ সময়তে অসম চৰকাৰে ক’ৰোনা ৰোগীৰ চিকিৎসা ব্যৱস্থা উন্নত কৰাৰ লগতে চিকিৎসা ব্যৱস্থাৰ পৰিসৰ বৃদ্ধি কৰিবলৈ অহৰ্নিশে চেষ্টা কৰিছে৷ মুখ্যমন্ত্ৰী সৰ্বানন্দ সোণোৱাল আৰু স্বাস্থ্যমন্ত্ৰী ড০ হিমন্ত বিশ্ব শৰ্মাই ৰাইজৰ কল্যাণৰ বাবে কাম কৰি থকা পৰিলক্ষিত হৈছে৷

সোমবাৰে দুপৰীয়া পৰ্যন্ত অসমত মুঠ ৰোগীৰ সংখ্যা হৈ পৰিছে ২৮৩৫গৰাকী৷ অসমৰ পৰিস্থিতিক গুৰুত্বসহকাৰে লৈছে কেন্দ্ৰীয় চৰকাৰে৷ কেন্দ্ৰীয় চৰকাৰে ক’ৰোনা পৰীক্ষা কৰিবলৈ ৰাজ্যৰ আন এখন চিকিৎসা মহাবিদ্যালয়ক দায়িত্ব অৰ্পণ কৰিছে৷ ইণ্ডিয়ান কাউন্সিল ফৰ মেডিকেল ৰিচাৰ্ছ চমুকৈ আইচিএমআৰে পাহাৰীয়া জিলা কাৰ্বি আংলং জিলাৰ ডিফু চিকিৎসা মহাবিদ্যালয়ক কোৱিড-১৯ৰ টেষ্টিং লেব হিচাপে অনুমোদন জনাইছে৷ এই কথা খোদ ৰাজ্যৰ স্বাস্থ্যমন্ত্ৰী হিমন্ত বিশ্ব শৰ্মাই টুইট কৰি ৰাজহুৱা কৰিছে৷ ৰাজ্যখনৰ ৭খন চিকিৎসা মহাবিদ্যালয়ে কোৱিড-১৯ৰ পৰীক্ষা কৰাৰ সুবিধাৰে পৰ্যাপ্ত হৈ উঠিল৷