মঙলদৈঃ দৰং জিলাৰ কুৰুৱাত হত্যাৰ অভিযুক্ত পৰিয়ালৰ বাসগৃহত অগ্নি সংযোগ কৰাত উত্তেজনাই বিৰাজ কৰিছে৷ কুৰুৱাৰ বমন পথাৰত হত্যাৰ অভিযুক্ত পৰিয়ালৰ বাসগৃহত অগ্নি সংযোগ কৰাত উত্তপ্ত পৰিস্থিতিৰ সৃষ্টি হয়৷ হত্যাকাণ্ডৰ অভিযুক্তৰ গৃহত উত্তেজিত ৰাইজে অগ্নি সংযোগ কৰাত দাই-দাউকে জ্বলি উঠে হত্যাকাৰীৰ বাসগৃহ৷ দাউ-দাউকৈ জ্বলি উঠা হত্যাকাণ্ডৰ অভিযুক্তৰ ঘৰৰ জুই নুমুৱাবলৈ চেষ্টা কৰি বিফল হয় ছিপাঝাৰ আৰক্ষী৷

ঘটনা সংঘটিত হোৱাৰ পিছতে আৰক্ষী উপস্থিত হয় যদিও জুই নুমুৱাবলৈ সক্ষম নহ’ল৷ জঘন্য হত্যাকাণ্ডত জড়িত থকাৰ অভিযোগত ইতিমধ্যে হস্ত বাহাদুৰ চাৰ্কী ওৰফে দীপক চাৰ্কীক আৰক্ষীয়ে গ্ৰেপ্তাৰ কৰিছে৷ হত্যাকাণ্ডৰ অভিযুক্ত তিনি ভাই ককাইৰ ঘৰ লণ্ড-ভণ্ড কৰি ৰাইজে অগ্নি সংযোগ কৰে৷ ঘটনাস্থলিত দৰং জিলাৰ উচ্চপদস্থ আৰক্ষী বিষয়া উপস্থিত হৈ পৰিস্থিতি নিয়ন্ত্ৰণৰ চেষ্টা কৰে৷

উল্লেখ্য যে, দৰঙৰ কুৰুৱাত শনিবাৰে পাহাৰৰ গাতত উদ্ধাৰ হৈছিল ২৬ বছৰীয়া যুৱকৰ মৃতদেহ৷ পাহাৰত দুখন ভৰি ওলাই থকা প্ৰত্যক্ষ কৰিছিল স্থানীয় লোকে৷ তাৰ পিছতে আৰক্ষীৰ উপস্থিতিত যেতিয়া গাত খান্দি মৃতদেহ উদ্ধাৰ কৰা হৈছিল৷ তাৰ পিছৰ দৃশ্য আছিল ভয়াবহ৷ যুৱকজনক হত্যা কৰি শৰীৰ ৭টা ভাগ কৰিছিল৷ শৰীৰৰ সাত টুকুৰা বস্তাত ভৰাই পুতি থৈছিল৷ এনেদৰে টুকুৰা কৰা হৈছিল যেন কচাইখানাত জন্তু বধ কৰা হৈছিল৷

হত্যাকাৰীয়ে ৭ টুকুৰা কৰি বস্তাত ভৰাই পুতি থোৱা কুৰুৱাৰ যুৱকজনৰ নাম আছিল টেগ বাহাদুৰ চাৰ্কি৷ কুৰুৱাৰ বৰ্মনপাৰাৰ ২৬ বছৰীয়া চাৰ্কি আছিল পেচাত পাচলি ব্যৱসায়ী৷ বৃহস্পতিবাৰৰ নিশাৰে পৰা নিৰুদ্দেশ হৈ আছিল চাৰ্কি৷ পৰিয়ালে বিচাৰ-খোচাৰ কৰি কোনো সন্ধান নোপোৱাত আৰক্ষীৰ ওচৰ চাপে৷ তাৰ লগতে শনিবাৰে স্থানীয় ৰাইজে গাঁওবুঢ়াৰ নেতৃত্বত পাহাৰৰ জংঘলত বিচাৰি-খোচাৰ কৰে৷

অৱশেষত স্থানীয় ৰাইজে পাহাৰত দুখন ভৰি ওলাই থকা প্ৰত্যক্ষ কৰে৷ তাৰ পিছতেই আৰক্ষীক খবৰ দিয়া হয়৷ ছিপাঝাৰ আৰক্ষীৰ এটা দলে টেগ বাহাদুৰ চাৰ্কিৰ মৃতদেহ গাত খান্দি উলিয়াই৷ মৃতদেহ বস্তাত ভৰাই ৭ টুকুৰা কৰিছিল৷ আৰক্ষীয়ে মৃতদেহ উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰিছে হত্যাকাণ্ডৰ সৈতে জড়িত লোকক ধৰিবলৈ অভিযান আৰম্ভ কৰিছে৷ আনহাতে স্থানীয় ৰাইজে পূৰ্বৰ ঘটনাক সাক্ষী কৰি টেগ বাহাদুৰক হত্যা কৰাৰ অভিযোগ উত্থাপন কৰিছে একেটা এলেকাৰ তিনি ভাতৃ দীপক চাৰ্কি, ধ্ৰুৱ চাৰ্কি আৰু গোপাল চাৰ্কিৰ বিৰুদ্ধে৷

এজনত ইতিমধ্যে গ্ৰেপ্তাৰ কৰিছে যদিও বাকী কেইজন বৰ্তমান পলাতক বুলি ৰাইজে জানিবলৈ দিয়ে৷ উল্লেখ্য যে, পৰকীয়া প্ৰেমৰ পৰিণতিত এই নাৰকীয় হত্যাকাণ্ড সংঘটিত হোৱা বুলি স্থানীয় ৰাইজে আশংকা ব্যক্ত কৰিছে৷ হত্যাকাণ্ডৰ সৈতে জড়িত অপৰাধীক শীঘ্ৰে গ্ৰেপ্তাৰ কৰি দৃষ্টান্তমূলক শাস্তি দিবলৈ দাবী জনাইছে ৰাইজে৷