টীয়কঃ উজনি অসমৰ টীয়কত চাহ খেতিয়কে বিক্ৰীৰ অভাৱত ৰাজপথত পেলাই দিছে কেঁচা চাহপাত৷ শুকুৰবাৰে টীয়কৰ চটাই ৩৭নং ৰাষ্ট্ৰীয় ঘাইপথত কুইণ্টলে কুইণ্টালে কেঁচা চাহপাত পেলাই দি প্ৰতিবাদ সাব্যস্ত কৰে টীয়ক অঞ্চলৰ ক্ষুদ্ৰ চাহ খেতিয়কসকলে।

জানিব পৰা মতে, দীৰ্ঘদিন ধৰি যোৰহাট জিলাৰ কেইবাটাও চাহ ফেক্টৰীয়ে গেছ নোহোৱাৰ অভিযোগ উত্থাপন কৰি ক্ষুদ্ৰ চাহ খেতিয়কৰ পৰা কেঁচাপাত নিয়মীয়াকৈ ক্ৰয় কৰা নাই৷ ফলত ব্যাপক ক্ষতিৰ সন্মুখীন হৈ হাহাকাৰ কৰিবলগীয়া হয় খেতিয়কসকলে। লক-ডাউনৰ ফলত ইতিমধ্যে চাহ উদ্যোগ ক্ষতিৰ সন্মুখীন হোৱাত এতিয়া ফেক্টৰীসমূহে গেছ নথকাৰ অজুহাতত পাত ক্ৰয় নকৰাত অৰ্থনৈতিক বিপৰ্যয়ৰ সন্মুখীন হৈছে৷

উত্তৰ-পূব চাহ সন্থা চমুকৈ নেটাৰ উপাধ্যক্ষই বিগত তিনিটা দিনত গেছ যোগান বন্ধ হৈ থকাৰ বাবে এনে সমস্যাৰ উদ্ভৱ হৈছে বুলি কয়। অনতি পলমে গেছ যোগানৰ ব্যৱস্থা নিয়মীয়া কৰিবলৈ চৰকাৰ তথা গেছ কোম্পানীক আহ্বান জনাইছে। উল্লেখ্য যে ইতিপূৰ্বে ফেক্টৰী মালিকসকলে অসম গেছ কোম্পানীৰ সৈতে এই বিষয়ত যোগাযোগ কৰাত বাঘজানৰ ঘটনাৰ আলম লৈ গেছ যোগানত ব্যাহত জন্মা বুলি কয়। যোৰহাট আৰু গোলাঘাট জিলাৰ ফেক্টৰীসমূহ গেছৰ সমস্যাৰ বাবে বন্ধ হৈ থকাত পথ কেঁচাপাত পেলাই প্ৰতিবাদ সাব্যস্ত কৰে ক্ষুদ্ৰ খেতিয়কসকলে৷