নতুন দিল্লীঃ অভিনেতা সুশান্ত সিং ৰাজপুতৰ আত্মহত্যাৰ চাঞ্চল্য মাৰ নৌযাওতেই দিল্লী আৰক্ষীৰ অনুসন্ধানত পোহৰলৈ আহিছে এক চাঞ্চল্যকৰ আত্মহত্যাৰ ঘটনা। এই সন্দৰ্ভত ইতিমধ্যে আৰক্ষীয়ে এজন নাবালকসহ ৪ জনকৈ লোকক গ্ৰেপ্তাৰ কৰে।

আৰক্ষীয়ে জনোৱা মতে কেবা লাখ টকাৰ ধাৰত পোত গৈ থকা দিল্লীৰ কড়কড়ডুমাৰ গৌৰৱ বাঞ্চাল নামৰ এজন ব্যৱসায়ী যোৱা ৯ জুনৰ পৰা সন্ধানহীন হৈ আছিল। ঘটনা সন্দৰ্ভত তেওঁৰ পত্নীয়ে ময়ূৰ বিহাৰ আৰক্ষী থানাত এজাহাৰ দাখিল কৰে। এজাহাৰত পত্নীয়ে গৌৰৱৰ কাৰো সৈতে কোনো ব্যক্তিগত শত্ৰুতা নাছিল বুলিও উল্লেখ কৰিছিল।

ইয়াৰ এদিন পিছতে অৰ্থাৎ ১০ জুনৰ পুৱা প্ৰায় ৮.৩০ বজাত দিল্লীৰ সমীপৱৰ্তী ৰণহোলা নামৰ এখন ঠাইত এটি নিজৰাৰ পাৰত ব্যৱসায়ীজনৰ মৃতদেহ গছত ওলমি থকা অৱস্থাত উদ্ধাৰ হয়। ব্যৱসায়ীজনৰ দুয়োখন হাত পিছফালৰ পৰা বান্ধি থোৱা আছিল বুলি সংবাদ মাধ্যমৰ আগত সদৰী কৰিছে আৰক্ষীয়ে।

জানিব পৰা মতে, ব্যৱসায় সংক্ৰান্তত গৌৰৱে কিছুদিন পূৰ্বে ৬ লাখ টকাৰ ব্যক্তিগত ঋণ লৈছিল। কিন্তু লকডাউন তথা অন্যান্য কাৰণত তেওঁৰ ব্যৱসায়ত লোকচানৰ পৰিমাণ বাঢ়িছিল। ফলত ঋণ পৰিশোধ কৰাতো তেওঁৰ পক্ষে অসম্ভৱ হৈ পৰে। সন্ধানহীন হোৱাৰ কেইদিনমান পূৰ্বে তেওঁৰ ক্ৰেডিট কাৰ্ডৰ পৰা কোনো চাইবাৰ অপৰাধীয়ে ৩.৫০ লাখ টকা সৰকাই নিয়াৰ কথাও জানিব পৰা গৈছে।

পিছফালে হাত বান্ধি থকা অৱস্থাত মৃতদেহ উদ্ধাৰ হোৱাৰ পিছতে আৰক্ষীয়ে হত্যাকাণ্ডৰ আঁৰত কোনো জড়িত থাকিব পাৰে সেই লৈ অনুসন্ধান আৰম্ভ কৰে। অনুসন্ধান কৰোতে জানিব পাৰে যে সন্ধানহীন হোৱাৰ পূৰ্বে গৌৰৱে নিজৰ ফোনেৰে এজন নাবালকৰ সৈতে যোগাযোগ কৰিছিল। পিছত নাবালকজনক আটক কৰি সোধ-পোচ কৰাত ঘটনাৰ সবিশেষ জানিব পাৰি আৰক্ষীৰ লোকসকলো হতবাক হৈ পৰে।

আৰক্ষীৰ সোধ-পোচত জানিব পৰা মতে, গৌৰৱে নাবালকজনৰ জৰিয়তে এটা প্ৰফেশ্যনেল হত্যাকাৰীৰ দলক নিজকে হত্যা কৰাৰ বাবে ছুপাৰি দিছিল। এই অনুযায়ী তেওঁ নিজৰ গাড়ী ঘৰতে ৰাখি আন কোনো উপায়েৰে ৰণহোলাত উপস্থিত হয়। তাতেই নাবালক আৰু আন ৩ জনে তেওঁ কোৱাধৰণৰে হাত দুখন পিছফালৰ পৰা বান্ধি দিয়ে।

হাত দুখন বান্ধি দি চাৰিজন প্ৰফেশ্যনেল হত্যাকাৰীয়ে এইবাৰ গৌৰৱক ৰছীৰে ডিঙিত বান্ধি এডাল গছত ওলমাই দিয়ে। ধৃত লোককেইজনে জনোৱা মতে কিছুসময় তেনেকৈ থকাৰ পিছতে গৌৰৱৰ মৃত্যু হৈছিল। গৌৰৱৰ মৃত্যু নিশ্চিত কৰি তেওঁলোকে সেই ঠাইৰ পৰা প্ৰস্থান কৰিছিল বুলিও জানিবলৈ দিয়ে।

ধৃত আন এজন লোকে জনোৱা মতে, গৌৰৱ ধাৰৰ বোজাত পোত গৈ মানসিকভাৱে ভাগি পৰিছিল। সেয়ে নিজৰ নামত থকা বীমাৰ মোটা অংকৰ ধন যাতে পৰিয়ালৰ লোকে লাভ কৰিব পাৰে তাৰ বাবে এনেদৰে নিজেই নিজক হত্যা কৰিবলৈ তেওঁলোকক ছুপাৰি দিছিল বুলি জনাইছে।

বৱসায়ীজনৰ মৃত্যুৰ এই কাৰণ জানিব পাৰি আৰক্ষীয়ে সম্প্ৰতি কিমান টকাৰ বিনিময়ত সমগ্ৰ ঘটনা সংঘটিত হৈছিল আৰু মৃত গৌৰৱৰ কিমান টকাৰ বীমা আছিল সেয়া জানিবলৈ তদন্ত অব্যাহত ৰাখিছে। নাবালকজনৰ লগতে ঘটনা সন্দৰ্ভত এই পৰ্যন্ত গ্ৰেপ্তাৰ কৰা লোককেইজন হৈছে কুমাৰ যাদৱ, সুৰজ আৰু সুমিত কুমাৰ।