গুৱাহাটী/নলবাৰীঃ নটসূৰ্য ফণী শৰ্মা বঁটা প্ৰাপক বিশিষ্ট মঞ্চাভিনেতা, শিল্পী জীৱেশ্বৰ ডেকা আৰু নাই। দেওবাৰে নিশা ১১ বাজি ৪০ মিনিটত হৃদৰোগত আক্ৰান্ত হৈ শেষ নিশ্বাস ত্যাগ কৰে শিল্পীগৰাকীয়ে।

শনিবাৰে নিশা নলবাৰী জিলাৰ বেলশৰৰ ডেকাপাৰাত থকা নিজ বাসগৃহত শিল্পীগৰাকী হঠাৎ হৃদৰোগত আক্ৰান্ত হৈ অসুস্থ হৈ পৰে। ততাতৈয়াকৈ তেওঁক নলবাৰীৰ ‘সাৰথি হাস্পতাল’ত ভৰ্ত্তি কৰোৱা হয়। স্বাস্থ্যৰ অধিক অৱনতি ঘটাত চিকিৎসকে তেওঁক গুৱাহাটী চিকিৎসা মহাবিদ্যালয় হাস্পতাললৈ প্ৰেৰণ কৰে।

নিশাৰ ভাগত শিল্পীগৰাকীক পৰিয়ালবৰ্গই গুৱাহাটী চিকিৎসা মহাবিদ্যালয় হাস্পতাললৈ লৈ আনি আইচিইউত ভৰ্তি কৰোৱায়। কিন্তু আইচিইউতে অভিনেতাজনে শেষ নিশ্বাস ত্যাগ কৰে। মৃত্যুৰ সময়ত তেওঁৰ বয়স আছিল ৭৫ বছৰ ।

মহেন্দ্ৰ বৰঠাকুৰ ৰচিত দধিচী নাটত কৰা অভিনয়ৰে ‘দধিচী’ নামেৰ খ্যাত হৈ পৰা ভ্ৰাম্যমাণ থিয়েটাৰৰ দুৰ্দান্ত অভিনেতা জীৱেশ্বৰ ডেকাই মিলন মালা, বালিঘৰৰ আলহী, সাগৰৰ সাঁকো, মন বাগিচাৰ গাভৰু আদি একাধিক নাটকত প্ৰাণৱন্ত অভিনয়ৰে অনুৰাগীসকলৰ মাজত দ সাঁচ বহুৱাই থৈ গৈছে। থিয়েটাৰ ভাগ্যদেৱী, মকুন্দ থিয়েটাৰ, ৰূপৰাজ থিয়েটাৰ, আৱাহন থিয়েটাৰ, মনালিছা থিয়েটাৰ, জ্যোতিৰূপা থিয়েটাৰকে আদি কৰি একাধিক ভ্ৰাম্যমাণ নাট্যদলত কেবাটাও দশক ধৰি অভিনয় কৰি মঞ্চ কপাই ৰাখিছিল অভিনেতাগৰাকীয়ে।

সফল মঞ্চভিনেতা জীৱেশ্বৰ ডেকাই ‘নটসূৰ্য ফনী শৰ্মা বঁটা’ৰ মুনলাইট মিডিয়া বঁটা, এনাজৰী এৱাৰ্ডৰ লগতে বিগত বৰ্ষত থিয়েটাৰ ভাগ্যদেৱীয়ে আগবঢ়োৱা শৰৎ মজুমদাৰ সোঁৱৰণী বঁটাও লাভ কৰিছিল। তেওঁৰ বিয়োগক ভ্ৰাম্যমাণ নাট্যজগতৰ বাবে এক অপূৰণীয় ক্ষতি আখ্যা দি সাংস্কৃতিক মহলে গভীৰ শোক প্ৰকাশ কৰিছে।