গোলাঘাটঃ ৰাজ্যত ক’ৰোনা মহামাৰীৰ আতংকৰ লগতে বান-গৰাখহনীয়াৰ সংহাৰী ৰূপ অব্যাহত আছে৷ ৰাজ্যৰ উজনি-নামনিৰ কেইবাখনো জিলা বান-খহনীয়াৰ কৱলত পৰাৰ সময়তে উজনি অসমৰ গোলাঘাট জিলাৰ কাঠকটীয়া অঞ্চল ব্যাপক খহনীয়াৰ কৱলত পৰিছে৷ প্ৰতি বছৰেই ধনশিৰি নৈৰ পানী বাঢ়ি অহাৰ পিছতে অঞ্চলটোৰ খেতি পথাৰ, ঘৰ-দুৱাৰ খহনীয়াৰ কৱলত পৰে৷ ৰাইজে বছৰৰ পিছত বছৰি ধৰি খহনীয়া ৰোধৰ বাবে জলসম্পদ মন্ত্ৰী-স্থানীয় বিধায়ক তথা প্ৰশাসনক দাবী জনাই আহিছে যদিও ৰাইজৰ দাবীক কেতিয়াও গুৰুত্ব নিদিয়াৰ গুৰুতৰ অভিযোগ উত্থাপন কৰিছে ৰাইজে৷

এইবেলিও ধনশিৰিৰ বানে প্ৰবল ৰূপ ধাৰণ কৰাৰ পিছৰে পৰা এই অঞ্চলটোৰ কেইবা শ পৰিয়ালৰ নিদ্ৰাহৰণ হৈছে৷ এক অজান শোকত ভাগি পৰি চকুলো টুকিছে পৰিয়ালসমূহে৷ খেতিৰ মাটি ডৰা, দেহৰ ঘাম মাটিত পেলাই কষ্টৰে গঢ় দিয়া ঘৰখন কোন সময়ত নৈৰ বুকুত জাহ যাব তাৰ কোনো ঠিক নাই৷ এনেবোৰ কথা ভাবিয়েই এতিয়া ভাগি পৰিছে পৰিয়ালসমূহে৷ ইফালে বানাপানী আনহাতে খহনীয়াৰ গ্ৰাস৷ কি কৰিব? কলৈ যাব পৰিয়ালসমূহ৷

জলসম্পদ মন্ত্ৰীয়ে শুনিবনে এইসকলৰ পৰিয়ালৰ বিননি৷ নৈৰ সোঁতত জীৱনৰ সকলো খহি পৰিছে। বিঘাই বিঘাই কৃষি ভূমি নষ্ট হৈছে। খহনীয়াৰ বাবে বাৰে এঠাইৰ পৰা আন ঠাইলৈ স্থানান্তৰ কৰিব লগা হৈছে মৰমৰ ঘৰখন। বিগত কেইবা বছৰ ধৰি খহনীয়াৰ ফলত বিঘাই বিঘাই কৃষি ভূমি, ঘৰ-বাৰী নৈত জাহ যোৱাৰ পিছতো চৰকাৰে লোৱা নাই কোনো ব্যৱস্থা। শীঘ্ৰে জলসম্পদ বিভাগক খহনীয়া ৰোধৰ ব্যৱস্থা গ্ৰহণৰ দাবী জনাই দুৰ্ভগীয়া কাঠকটীয়াবাসীয়ে৷