ডিব্ৰুগড়ঃ অৱশেষত জালত পৰিল কিশোৰক অকথ্য নিৰ্যাতন চলোৱাৰ অভিযুক্ত চিকিত্সক সিদ্ধিপ্ৰসাদ দেউৰী। ডিব্ৰুগড় জিলাৰ লাহোৱালত আত্মগোপন কৰি থকা অৱস্থাত চিকিত্সকজন গ্ৰেপ্তাৰ কৰিবলৈ সক্ষম হৈছে অসম আৰক্ষী। ঘৰত বন কৰা কিশোৰীক নিৰ্যাতন চলাই পলাই আছিল দেউৰী। এতিয়াও পলাতক দেউৰীৰ পত্নী মিতালী কোঁৱৰ৷ মিতালী কোঁৱৰ মৰাণ কলেজৰ অধ্যক্ষ।

চিকিৎসক আৰু অধ্যক্ষৰ এনে কাণ্ডই তীব্ৰ চাঞ্চল্যৰ সৃষ্টি কৰিছিল ৰাজ্যত৷ বৰ্বৰ আৰু পাশৱিক কাণ্ডই সভ্য সমাজক লজ্জানত কৰিছিল৷ অসমক কঁপাই গৈছিল ঘটনাই৷ উজনিৰ ডিব্ৰুগড় জিলাৰ পূব মিলন নগৰৰ চিকিৎসক ডা০ সিদ্ধিপ্ৰসাদ দেউৰীৰ বাসগৃহৰ পৰা শিশু কল্যাণ সমিতি আৰু চাইল্ড লাইনে ১২ বছৰীয়া কিশোৰক শৰীৰ ক’লা পৰি থকাৰ লগতে ছাল এৰি থকা অৱস্থাত উদ্ধাৰ কৰিছিল৷ অকথ্য নিৰ্যাতন চলোৱাৰ অভিযোগ উত্থাপন হৈছিল কিশোৰটোক৷ চিকিৎসকগৰাকীৰ বিৰুদ্ধে শিশু কল্যাণ সমিতিয়ে এজাহাৰ দাখিল কৰাত ডিব্ৰুগড় আৰক্ষীয়ে চিকিৎসকজনক গ্ৰেপ্তাৰৰ বাবে অভিযান আৰম্ভ কৰিছিল যদিও ঘৰ এৰি পলায়ন কৰিছিল।

নাবালক কিশোৰক চিকিৎসকজনে প্ৰায়ে শাৰীৰিক মানসিক-নিৰ্যাতন চলোৱাৰ লগতেতে উদ্ধাৰৰ দুদিন পূৰ্বে গৰম পানী ঢালি দিছিল কিশোৰৰ দেহত৷ ফলত নাবালক কিশোৰটোৰ গাৰ নোম-ছাল বখলা-বখলে এৰি গৈছিল৷ কিশোৰৰ গাৰ ছাল এৰি যোৱাৰ লগতে বুকুৰ অংশত কোমল কিশোৰটোৰ মঙহ ওলাই আহিছিল৷ কিশোৰৰ অৱস্থা সংকটজনক হোৱাত প্ৰশাসনে ডিব্ৰুগড়ৰ প্ৰেৰণা শিশু গৃহত ৰাখি চিকিৎসাৰ ব্যৱস্থা কৰিছে৷

২০১৯ চনৰ এপ্ৰিল মাহত যোৰহাটৰ এখন চাহ বাগিচাৰ পৰা চিকিৎসক জনে নিজ গৃহলৈ আনিছিল কিশোৰটোক৷ বনকৰা কিশোৰ হিচাপে ৰাখি অকথ্য নিৰ্যাতন চলোৱাৰ অভিযোগ উত্থাপন হৈ আহিছিল৷ ইমানে নহয় কিশোৰক উদ্ধাৰ কৰিবলৈ যোৱা প্ৰশাসনৰ লোকক কিশোৰটোৰ উপাধি দেউৰী বুলি চিনাকী দিছিল৷ মিছা কথাৰ আশ্ৰয় লৈ চিকিৎসক দৈউৰীয়ে নিজক ৰক্ষা কৰিব খুজিছিল৷ পঢ়াই থকা বুলিও কৈছিল৷