প্ৰথমবাৰৰ বাবে অসমত অনুষ্ঠিত জলপথ সন্মিলনৰ আজি সামৰণি পৰে৷ কেন্দ্ৰীয় বন্দৰ, জাহাজ আৰু জলপথ মন্ত্ৰী সৰ্বানন্দ সোণোৱালৰ তৎপৰতাত ডিব্ৰুগড়ত অনুষ্ঠিত জলপথ সন্মিলন দেশ-বিদেশৰ প্ৰতিনিধি তথা উচ্চপদস্থ বিষয়াই অংশ লয়৷ সোমবাৰে কেন্দ্ৰীয় মন্ত্ৰী সৰ্বানন্দ সোণোৱাল এই সন্মিলন মুকলি কৰিছিল৷ দুদিনীয়াকৈ অনুষ্ঠিত জলপথ সন্মিলন ২০২২-ত বিশেষ প্ৰদৰ্শনী অনুষ্ঠিত হয়৷ জলপথৰ জৰিয়তে আঞ্চলিক সংযোগ বৃদ্ধি কৰাৰ উপায় আৰু সুযোগ-সম্ভাৱনা সন্দৰ্ভত সন্মিলনত সবিস্তাৰে আলোচনা হয়। এই সন্মিলনত বিশেষকৈ উত্তৰ-পূৰ্বাঞ্চল আৰু চুবুৰীয়া দেশৰ প্ৰতিনিধিয়ে অংশ লয়৷ নদী পথৰ সংযোগ যোগে অসমৰ সৈতে চুবুৰীয়া ৰাজ্য আৰু দেশৰ সৈতে ব্যৱসায় কৰাৰ বাবে এই সন্মিলনত গুৰুত্ব প্ৰদান কৰা হয়৷ আজি দ্বিতীয় দিনটোৰ কাৰ্যসূচীত বন্দৰ, জাহাজ পৰিবহণ আৰু জলপথ মন্ত্রী সর্বানন্দ সোণোৱালৰ লগতে মুখ্যমন্ত্রী ড০ হিমন্ত বিশ্ব শৰ্মা কেইবাগৰাকী মন্ত্ৰী আৰু সাংসদ উপস্থিত থাকে৷ দ্বিতীয় দিনৰ সন্মিলনত সৰ্বানন্দ সোণোৱালে জলপথৰ পৰিৱেশতন্ত্ৰৰ অনুকূল আৰু সামগ্রিক বিকাশৰ জৰিয়তে চুবুৰীয়া ৰাষ্ট্ৰসমূহৰ সৈতে শক্তিশালী ব্যৱসায়িক সম্পৰ্ক গঢ়ি তোলা হ’ব বুলি কৈ কয় যে জলপথৰ আন্তঃগাঁথনি উন্নীতকৰণে দেশৰ লগতে অসম তথা উত্তৰ-পূবৰ যুৱ উদ্যোগীৰ সুযোগ-সম্ভাৱনাৰ দুৱাৰমুখ মুকলি কৰিব৷ ইয়াৰ দ্বাৰা প্ৰধানমন্ত্ৰী নৰেন্দ্ৰ মোদীৰ আত্মনিৰ্ভৰশীল ভাৰতৰ দৃষ্টিভংগীক বাস্তৱ কৰিবলৈ সকলোৰে সহায় কামনা কৰে। মুখ্যমন্ত্রী হিমন্ত বিশ্ব শৰ্মাই জলপথৰ যাত্ৰীক সুৰক্ষিত আৰু সুবিধাজনক ফেৰী সেৱা প্ৰদানৰ বাবে অভ্যন্তৰীণ জল পৰিবহণ প্রকল্প ৰূপায়ণ কৰাৰ কথা উল্লেখ কৰি কয় যে উত্তৰ-পূবৰ জলপথ পৰিস্থিতিতন্ত্ৰৰ গুৰুত্ব আছে৷ ব্রহ্মপুত্র নদীৰ অৱবাহিকাত ভাৰতৰ জলসম্পদৰ সম্ভাৱনা মজুত থকাৰ লগতে স্থলপথেৰ পৰিবহন নিৰ্ভৰশীলতা যথেষ্ট হ্ৰাস হ’ব বুলি দাবী কৰে ড০ শৰ্মাই৷অনুষ্ঠানত বাংলাদেশৰ প্ৰতিনিধি হৈ অহা বাংলাদেশৰ জাহাজ পৰিবহণ মন্ত্রী খালিদ মাহমুদ চৌধুৰীয়ে কয় যে বাংলাদেশত ৭০০ নদ-নদী আছে৷ ইয়াৰে ৫৪ খন নদ-নদী ভাৰতৰে সম্পৰ্কিত। বাংলাদেশ, ভাৰত, নেপাল আৰু ভূটানৰ মাজত সামগ্ৰী পৰিবহণ আৰু বিতৰণৰ বাবে বাংলাদেশৰ প্ৰায় ৮৪৮০ কিলোমিটাৰ জলপথ ব্যৱহাৰ কৰিব পাৰি৷