বেইজিংঃ চীনত সংঘটিত হৈছে এক অঘটন। দেশখনৰ চানজি প্ৰদেশৰ জিয়াংফেন অঞ্চলত জন্মদিনৰ পাৰ্টি চলি থকা অৱস্থাত এখন ৰেষ্টুৰেণ্ট ভাঙি অতি কমেও ২৯ জন লোকৰ মৃত্যু হয়।

প্ৰকাশিত বাতৰি অনুযায়ী শনিবাৰে জিয়াংফেন অঞ্চলৰ জুজিয়াং নামৰ এখন ৰেষ্টুৰেণ্টত আয়োজন কৰা হৈছিল এজন লোকৰ জন্মদিনৰ পাৰ্টি। উক্ত পাৰ্টিত প্ৰায় ৭০০ জন লোক উপস্থিত আছিল।

উক্ত পাৰ্টিত অভ্যাগতসকলে আনন্দ উপভোগ কৰি থকাৰ সময়তে হঠাতে ৰেষ্টুৰেণ্টখনৰ দুমহলীয়া অট্টালিকাটো খহি পৰে। ফলত তাত উপস্থিত থকা সকলো লোক ধ্বংসস্তূপত আৱদ্ধ হৈ পৰে। আৰু ইয়াৰে ৯০ জন লোক ধ্বংসস্তূপৰ তলত সোমাই পৰে।

উদ্ধাৰকাৰী দলে ধ্বংসস্তূপৰ মাজৰ পৰা ২৯ জন লোকক মৃত অৱস্থাত আৰু অন্য ৬০ গৰাকীক আহত অৱস্থাত উদ্ধাৰ কৰিছে। আহতসকলক ততালিকে চিকিৎসাৰ বাবে চিকিৎসালয়ত ভৰ্তি কৰোৱা হৈছে আৰু ইয়াৰে অধিক সংখ্যকৰে অৱস্থা অতি সংকটজনক বুলি জানিব পৰা গৈছে।

জন্মদিনৰ পাৰ্টি চলি থকা অৱস্থাত হঠাতে এই মৰ্মান্তিক দুৰ্ঘটনাটো সংঘটিত হৈছে যদিও এতিয়াও দুৰ্ঘটনাৰ প্ৰকৃত কাৰণ জানিব পৰা হোৱা নাই। ঘটনা সন্দৰ্ভত তদন্ত আৰম্ভ কৰিছে স্থানীয় প্ৰশাসনে।