গুৱাহাটীঃ ক’ৰোনা সন্ত্ৰাসৰ মাজতে শুকুৰবাৰে ৰাজ্যৰ উচ্চ আৰু নিম্ন প্ৰাথমিক বিদ্যালয়ত ৫৩১৯গৰাকী শিক্ষকক স্থায়ী নিযুক্তি দিয়ে ৰাজ্যৰ শিক্ষা বিভাগে৷ মুখ্যমন্ত্ৰী সৰ্বানন্দ সোণোৱাল আৰু শিক্ষা মন্ত্ৰী ড০ হিমন্ত বিশ্ব শৰ্মা, শিক্ষা বিভাগৰ ৰাজ্যিক মন্ত্ৰী ভৱেশ কলিতাৰ উপস্থিতিত শ্ৰীমন্ত শংকৰদেৱ কলাক্ষেত্ৰত অনুষ্ঠিত নিয়োগ পত্ৰ বিতৰণ অনুষ্ঠানত নিযুক্তি পত্ৰ বিতৰণ কৰা হয়।

প্ৰাথমিক শিক্ষা সঞ্চালকালয়ৰ অধীনত উচ্চ আৰু নিম্ন প্ৰাথমিক বিদ্যালয়ত নিযুক্তি লাভ কৰা ৫৩১৯ শিক্ষক-শিক্ষয়িত্ৰীলৈ অভিনন্দন আৰু শুভেচ্ছা জ্ঞাপন কৰে মুখ্যমন্ত্ৰী সোণোৱালে৷

শংকৰদেৱ কলাক্ষেত্ৰ অনুষ্ঠিত নিযুক্তি পত্ৰ বিতৰণ অনুষ্ঠানত মন্ত্ৰী হিমন্ত বিশ্ব শৰ্মাই কয় যে শিক্ষক নিযুক্তিৰে ৰাজ্যৰ খালী হৈ থকা শিক্ষক পদসমূহ পূৰণ কৰি অসমৰ শিক্ষা ব্যৱস্থাক এক নতুন গতি প্ৰদান কৰিবলৈ চৰকাৰে চেষ্টা চলাই আছে। পূৰ্বে শিক্ষা বিভাগত ব্যাপক অনিয়ম সংঘটিত হৈছিল বুলি কয়৷

ইফালে অনুষ্ঠানতে মন্ত্ৰী হিমন্ত বিশ্ব শৰ্মাই অহা ছেপ্তেম্বৰ মাহৰ ভিতৰত আৰু ১০ হাজাৰ শিক্ষকক নিযুক্তি প্ৰদান কৰাৰ আশ্বাস প্ৰদান কৰে৷ ফেব্ৰুৱাৰী মাহৰ ভিতৰত ৰাজ্যত নতুনকৈ ৫০ হাজাৰ নতুন নিযুক্তিৰ লক্ষ্য বান্ধিছে লোৱাৰ লগতে ৭ ছেপ্তেম্বৰৰ পূৰ্বে হাইস্কুল পৰ্যন্ত শিক্ষক নিযুক্তি দিয়াৰ প্ৰক্ৰিয়া আৰম্ভ কৰিব ৰাজ্যৰ শিক্ষা বিভাগে।