মুম্বাই: ছীল কৰা হ’ল কোকিলকণ্ঠী গায়িকা লতা মাংগেশকাৰৰ বাসগৃহ। কৰ’না মহামাৰীৰ সময়ত লতা মাংগেশকাৰৰ বাসগৃহ ছীল কৰা ঘটনাই যথেষ্ট চৰ্চা লাভ কৰিছে। দক্ষিণ মুম্বাইৰ পেড্ডাৰ পথত থকা কোকিলকণ্ঠী গায়িকা লতা মাংগেশকাৰৰ বাসগৃহ প্ৰভুকুঞ্জ ভৱন ছীল কৰিলে বৃহত্তৰ মুম্বাই মহানগৰ পালিকাই। এক বক্তব্যত গায়িকা লতা মাংগেশকাৰৰ পৰিয়ালবৰ্গয়ে কয় যে, ভৱনটোত যথেষ্টসংখ্যক জ্যেষ্ঠ নাগৰিক বাস কৰে বাবেই প্রশাসনে এই সিদ্ধান্ত গ্ৰহণ কৰিছে। লগতে কয়, কৰ’না মহামাৰীৰ প্ৰকোপৰ প্ৰতি লক্ষ্য ৰাখি এই সিদ্ধান্ত অতি জৰুৰী আছিল । কৰ’না মহামাৰীৰ বাবে ভৱনটোত সামাজিক দূৰত্বৰ লগতে ক’ভিড সংক্ৰমণৰ ক্ষেত্ৰত লবলগীয়া সকলো নীতি-নিয়ম পালনেৰে সাধাৰণভাৱে আয়োজন কৰা হৈছিল গণেশ উৎসৱ।

খবৰ অনুসৰি, বিগত দিনত ভৱনটোৰ কেইগৰাকীমান লোকৰ দেহত ক’ভিড পজিটিভ পোৱা গৈছিল। সেইবাবে উক্ত ভৱনটোত বাস কৰা লোক সকলে ক’ভিডৰ ক্ষেত্ৰত লবলগীয়া সকলো সাৱধানতা গ্ৰহণ কৰিছে। ভৱনটোত বিশেষকৈ জ্যেষ্ঠলোকসকলৰ স্বাস্থ্যৰ সুৰক্ষাৰ ক্ষেত্ৰত যথেষ্ট সাৱধানতা অবলম্বন কৰিছে। নেদেখাজনৰ কৃপাত লগতে শুভাকাংক্ষী তথা বহু গুণমুগ্ধৰ আশীৰ্বাদত কোকিল কণ্ঠী গায়িকা লতা মাংগেশকাৰ আৰু তেঁওৰ পৰিয়াল সুৰক্ষিত হৈ আছে।