ছিপ লৈ থকা অৱস্থাত এডাল গছৰ ডালত প্ৰেমিক-প্ৰেমিকাৰ মৃতদেহ উদ্ধাৰ
- Update Time : Thursday, June 4, 2020
- 154 Time View
কাছাৰঃ বৰাক উপত্যকাৰ কাছাৰ জিলাৰ ধলাই ৰাজঘাটত এহাল প্ৰেমিক-প্ৰেমিকাই একেডাল পঘাৰে আত্মহত্যা কৰাৰ ঘটনাই চাঞ্চল্যৰ সৃষ্টি কৰিছে৷ বৃহস্পতিবাৰে পুৱা ধলাই ৰাজঘাটত পথৰ দাতিৰ এডাল গছৰ ডালত প্ৰেমিক-প্ৰেমিকাৰ মৃতদেহ ছিপ লৈ থকা অৱস্থাত প্ৰত্যক্ষ কৰে৷ লগে লগে স্থানীয় আৰক্ষীক খবৰ দিয়াত আৰক্ষীয়ে প্ৰেমিক-প্ৰমিকা হালক চিনাক্ত কৰিছে৷ জানিব পৰা মতে, কাছাৰৰ কচুধৰমৰ পৰা আত্মহত্যা কৰা যুৱতীগৰাকীয়ে ৰাজঘাটৰ মোমায়েকৰ ঘৰলৈ ফুৰিবলৈ আহিছিল৷ যুৱকজন ৰাজঘাটৰে বুলি জানিব পৰা গৈছে৷
যুৱতীগৰাকীয়ে মোমায়েকৰ ঘৰলৈ অহাৰ পিছত কি কাৰণত প্ৰেমিক-প্ৰেমিকা হালে এনে সিদ্ধান্ত গ্ৰহণ কৰিলে সেই কথা জানিব পৰা হোৱা নাই৷ একাংশ লোকে দুয়োজনৰ মাজত দীৰ্ঘদিন ধৰি প্ৰেম-ভালপোৱা চলি আছিল বুলি কয়৷ আৰক্ষীয়ে ঘটনাৰ খবৰ পোৱাৰ পিছতে ঘটনাস্থলিত উপস্থিত হৈ প্ৰাথমিক তদন্তৰ অন্তত মৃতদেহ নমাই মৰণোত্তৰ পৰীক্ষাৰ ব্যৱস্থা কৰে৷ আৰক্ষীয়ে ঘটনাৰ তদন্ত অব্যাহত ৰাখিছে যদিও এতিয়ালৈ কোনো ধৰণৰ মন্তব্য প্ৰকাশ কৰা নাই৷
