জোনমণি বেগ, বিশ্বনাথঃ দুদিন পূৰ্বে এগৰাকী খৰি কটীয়াক বিশ্বনাথ চাৰিআলিৰ অসম-অৰুণাচল সীমান্তৰ পাচলগীত গুলীয়াই হত্যা কৰাৰ ঘটনাৰ প্ৰকৃত ৰহস্য পোহৰলৈ আহিছে৷ কোনো উগ্ৰপন্থী তথা অচিনাক্ত বন্দুকধাৰীয়ে বিনোদ ৰাজগড় নামৰ যুৱকজনক হত্যা কৰা নাছিল৷ তেওঁক হত্যা কৰিছিল খৰি কটীয়াৰ বন্ধু চোৰাং চিকাৰী বিশ্বজিৎ সোমাইনা দৈমাৰীয়ে৷ সোমাইনাই নিজ হাতত থকা বন্দুকেৰে গুলীয়াই হত্যা কৰিছিল বন্ধু বিনোদ ৰাজগড়ক৷ এই কাণ্ড সংঘটিত হৈছিল মঙলবাৰে৷

মঙলবাৰে বনাঞ্চলত খৰি আনিবলৈ যোৱা বিনোদ ৰাজগড়ক যুৱকজনক অচিনাক্ত দুবৃত্তই গুলীয়াই হত্যা কৰা বুলি প্ৰচাৰ হৈছিল৷ এই খবৰে তীব্ৰ চাঞ্চল্যৰ সৃষ্টি কৰে৷ দুৰ্বত্তই হত্যা কৰা যুৱকজনৰ পৰিয়ালক উপযুক্ত ক্ষতিপূৰণৰ প্ৰতিশ্ৰুতি দিলেহে মৃতদেহ মৰণোত্তৰ পৰীক্ষাৰ বাবে প্ৰেৰণ কৰিবলৈ দিব বুলি হুলস্থূলীয়া পৰিবেশৰ সৃষ্টি কৰিছিল৷

কিন্তু সেই ঘটনাৰ ৪৮ ঘণ্টা পাৰ নৌহওঁতেই বিশ্বনাথ আৰক্ষীয়ে উৎঘাটন কৰিলি ঘটনাৰ প্ৰকৃত ৰহস্য৷ ইতিমধ্যে অস্ত্ৰসহ গ্ৰেপ্তাৰ কৰিলে হত্যাকাৰী তেওঁৰ বন্ধু বিশ্বজিৎ দৈমাৰি ওৰফে সোমনাক৷ জানিব পৰা মতে, বিনোদ ৰাজগড়ে খৰিকাটিবলৈ নহয়, বনাঞ্চলত প্ৰবেশ কৰিছিল চোৰাং চিকাৰৰ বাবে৷ উক্ত দিনা চোৰাং চিকাৰৰ বাবে বন্ধু বিশ্বজিতৰ সৈতে হস্ত্ৰ নিৰ্মিত বন্দুক সহ জংঘলত প্ৰৱেশ কৰিছিল বিনোদ ৰাজগড়৷

জংঘলৰ ভিতৰত দুয়োৰে অজ্ঞাত কাৰণত কাজিয়াৰ সূত্ৰপাত হয় আৰু সোমাইনা দৈমাৰিয়ে নিজ হাতত থকা বন্দুকৰেই বিনোদ ৰাজগড়ক গুলীয়াই হত্যা কৰে। তাৰ পিছতে বিনোদৰ হাতত থকা বন্দুকটো ঘটনা সংঘটিত কৰা স্থানৰ কাষতে পেলাই হত্যাকৰী বিশ্বজিৎ ওৰফে সোমাইনাই সেই স্থানৰ পৰা আহি তেওৰে বন্ধু তথা প্ৰাক্তন এন ডি এফ বিৰ বিষয়া গবলাই বসুমতাৰীৰ হাতত বিশ্বজিতে নিজৰ বন্দুকটো ৰাখিবলৈ দি বিনোদৰ পৰিয়ালক এই গবলাইৰ দ্বাৰাই সমস্ত ঘটনাৰ এক নাটকীয় ৰূপ দিবলৈ চেষ্টা কৰে।

আনহাতে বিনোদ আৰু বিশ্বজিত ওৰফে সোমাইনাক চিকাৰৰ বাবে হস্ত নিৰ্মিত বন্দুক বাৰুদ যোগান দিছিল তেওঁলোকৰে বন্ধু কমল বসুমতাৰীয়ে। ইতিমধ্যে এই ঘটনা সংঘটিত হোৱা ৪৮ঘন্টাৰ ভিতৰতে বিশ্বনাথ জিলা আৰক্ষী অধীক্ষক ৰাজেন সিঙৰ নেতৃত্বত বিশ্বনাথ আৰক্ষীৰ এটা দলে এই হত্যাকাণ্ড সংঘটিত কৰা বিশ্বজিত ওৰফে সোমাইনা দৈমাৰী লগতে এই হত্যাকাণ্ডত অস্ত্ৰ যোগান ধৰা কমল বসুমতাৰী আৰু এই হত্যাক নাটকিয় ৰূপ দিবলৈ চেষ্টা কৰা তথা এন ডি এফ বিৰ প্ৰাক্তন বিষয়া গবলাই বসুমতাৰীক দুটা হস্ত্ৰ নিৰ্মিত বন্দুক, বাৰুদ সহ গ্ৰেপ্তাৰ কৰিবলৈ সক্ষম হয়।

কিন্তু এতিয়া পৰ্যন্ত বিশ্বজিত ওৰফে সোমাইনাই কিয় বিনোদ ৰাজগড়ক গুলীয়াই হত্যা কৰিলে সেই কথা স্বীকাৰ নকৰি দুৰ্ঘটনাবশত বন্দুকৰ গুলী ওলাই বিনোদ ৰাজগড় নিহত হৈছিল বুলি বুলিহে মন্তব্য কৰিছে যদিও আৰক্ষীয়ে এই কথা মানিব খোজা নাই৷ সেয়েহে সোমাইনাক সোধা-পোছা অব্যাহত ৰাখিছে। হত্যা নে দুৰ্ঘটনা সেইয়া সময়ত৷ পোহৰলৈ আহিব যদিও চোৰাংচিকাৰীৰ দপদপনিযে অসম-অৰুণাচল সীমান্ততো অব্যাহত আছে সেই কথা এই ঘটনাই প্ৰমান কৰিছে৷