চিৰাঙৰ বিজনীত শুৰ পোকৰ পৰিত্ৰাণ বিছাৰি কৃষকৰ পূজা অৰ্চনা
- Update Time : Tuesday, August 25, 2020
- 93 Time View
বঙাইগাঁওঃ ৰাজ্যত বানৰ তাণ্ডৱে কৃষকক মাধমাৰ শোধোৱাৰ পিছত এইবাৰ শুৰ পোকৰ সন্ত্ৰাসত মূৰে কপালে হাত দিবলগা হৈছে কৃষকসকল। ৰাজ্যৰ কৃষি বিভাগৰ হেমাহিৰ বাবে এতিয়া সেউজীয়া হ’বলৈ ধৰা বিঘাই বিঘাই ধানৰ খেতি শুৰ পোকে অনিষ্ট সাধন কৰাত ৰাজ্যৰ বিভিন্ন প্ৰান্তৰ কৃষকসকল উপায়বিহীন হৈ পৰিছে।
অশেষ কষ্টৰ ঘাম মাটিত পেলাই ৰ’দ-বৰষুণকো নেওচি কৰা খেতিখনত শুৰ পোকৰ আক্ৰমণত উপায়হীন হৈ এতিয়া ঈশ্বৰ প্ৰাৰ্থনাৰে নিজৰ খেতিডৰা শুৰ পোকৰ পৰা বচাই ৰখাৰ চেষ্টা চলাইছে চিৰাং জিলাৰ বিজনীৰ ১নং ফাগুণাগাঁৱৰ খেতিয়কসকলে। জানিব পৰা মতে, ১নং ফাগুণাগাঁৱৰ অন্তৰ্গত ৮৫টা কৃষক পৰিয়ালৰ ৩২০ বিঘা মাটিৰ ভিতৰত প্ৰায়খিনিতে শুৰ পোকৰ আক্ৰমণ চলিছে। আনহাতে ৰাজ্যৰ কৃষি বিভাগে এই শুৰ পোকৰ বিৰুদ্ধে যুঁজিবলৈ প্ৰতি হাজাৰ বিঘা মাটিৰ বিপৰীতে মাত্ৰ ৩ লিটাৰ কীটনাশক প্ৰদান কৰাৰো অভিযোগ তুলিছে খেতিয়কসকলে।
এনে পৰিপ্ৰেক্ষিততে সোমবাৰে অঞ্চলটোৰ কৃষক ৰাইজে পূজা অৰ্চনা আৰু নাম-কীৰ্ত্তনেৰে ধনৰ দেৱী লক্ষ্মীক আৰধনা কৰি খেতিডৰা বচোৱাৰ চেষ্টা চলাইছে।
