ডিজিটেল ডেস্কঃ অভিনেতা সুশান্ত সিং ৰাজপুতৰ মৃত্যু গোচৰত গ্ৰেপ্তাৰ হ’ব পাৰে অভিনেতাজনৰ প্ৰাক্তন প্ৰেয়সী তথা অভিনেত্ৰী ৰিয়া চক্ৰৱৰ্তী। সুশান্ত সিং ৰাজপুতৰ সৈতে অভিনেত্ৰীগৰাকীৰ সম্পৰ্কক লৈ ন ন তথ্য পোহৰলৈ আহি আছে প্ৰতিদিনে। শেহতীয়াকৈ সুশান্তৰ ৰান্ধনী নিৰজেই চিবিআইৰ সন্মুখত মন্তব্য কৰিছিল যে সুশান্তৰ ঘৰলৈ প্ৰায়ে আহ-যাহ আছিল ৰিয়া চক্ৰৱৰ্তী আৰু তেওঁৰ ভাতৃৰ।

সোমবাৰে মৃত অভিনেতা সুশান্ত সিং ৰাজপুতৰ পিতৃৰ হৈ অধিবক্তা বিকাশ সিঙে সংবাদ মাধ্যমৰ সন্মুখত কয় যে অভিনেতাজনৰ মৃত্যু গোচৰৰ তদন্ত চলাই থকা চিবিআইয়ে ইতিমধ্যে ৰিয়া চক্ৰৱৰ্তীলৈ চমন জাৰি কৰি চিবিআইৰ কাৰ্যালয়ত উপস্থিত হোৱাৰ নিৰ্দেশ দিছে। চিবিআইয়ে গোচৰৰ তদন্তত ইতিমধ্যে বিভিন্নজনক সোধা পোছা অব্যাহত ৰাখিছে। যদি চিবিআইৰ তদন্তত ৰিয়াই সহযোগ নকৰে বা সোধা প্ৰশ্নৰ ভুল উত্তৰ দিয়ে, তেন্তে তদন্তকাৰী সংস্থাটোৱে ৰিয়া চক্ৰৱৰ্তীক গ্ৰেপ্তাৰ কৰিব পাৰে।

সুশান্ত সিঙৰ পিতৃৰ অধিবক্তা বিকাশ সিঙে কয়, ‘এক কঠোৰ আৰু পৰিশ্ৰমী তদন্তৰ অন্তত চিবিআইয়ে ৰিয়ালৈ চমন জাৰি কৰিছে। তেওঁলোকে এই তদন্তৰ খাতিৰত সকলোকে পৰীক্ষা নিৰীক্ষা কৰিছে। এবাৰ তেওঁলোকে তেওঁৰ প্ৰাথমিক তদন্ত সম্পূৰ্ণ কৰাৰ পিছত ৰিয়াক সোধা পোছা কৰিব। যদি এই সোধাপোছাত ৰিয়াই সঠিক উত্তৰ নিদিয়ে বা তদন্তত সহযোগ নকৰে, তেন্তে তেওঁৰ গ্ৰেপ্তাৰ হোৱাৰ সম্ভাৱনা বৃদ্ধি পাব। মই আশা কৰো তদন্তকাৰী সংস্থাটোৱে সঠিক বাটেৰে আগবাঢ়িবলৈ সক্ষম হ’ব।’

উল্লেখ্য যে, উচ্চতম ন্যায়ালয়ৰ নিৰ্দেশৰ পিছতে সুশান্ত সিঙ গোচৰৰ তদন্তভাৰ লাভ কৰা চিবিআইয়ে এটা ১০জনীয়া বিশেষ দল মুম্বাইলৈ প্ৰেৰণ কৰে। চিবিআইৰ দলটোৱে মুম্বাইত সুশান্তৰ ৰান্ধনী নিৰজক সোধা পোছা কৰাৰ লগতে অভিনেতাজনৰ মৰোণত্তৰ পৰীক্ষা কৰা চিকিৎসকগৰাকীকো সোধাপোছা চলায়। আনহাতে সোমবাৰে চিবিআইৰ দলটো মৃত্যুৰ পিছত সুশান্তৰ মৃতদেহ ৰখা ক’পাৰ হাস্পতালতো উপস্থিত হৈ তদন্ত চলায়।