বিশ্বনাথঃ সমগ্ৰ ভাৰতৰ লগতে অসমত ভয়াবহ ৰূপ ধাৰণ কৰিছে ক’ৰোনা মহমাৰীয়ে৷ নিতৌ সংখ্যা দ্ৰুত গতিত বৃদ্ধি হ’ব ধৰিছে৷ ফলত এই প্ৰকোপ ৰোধ কৰিবলৈ উঠিপৰি লাগিছে প্ৰশাসন৷ ইয়াৰ মাজতে মধ্য অসমৰ বিশ্বনাথ জিলাৰ চতিয়া আৰক্ষী থানাৰ অন্তৰ্গত চন্দ্ৰভেটী গাঁৱক প্ৰশাসনে কণ্টেইনমেণ্ট জ’ন ঘোষণা কৰিছে৷ এই এলেকাত কোনো লোকৰ প্ৰৱেশ, প্ৰস্থান সম্পূৰ্ণ ৰূপে নিষিদ্ধ ঘোষণা কৰিছে প্ৰশাসনে৷ চন্দ্ৰভেটী গাঁৱৰ ১৮ কৃষ্ণ কটোৱাল নামৰ যুৱকজন ক’ৰোনা ভাইৰাছত আক্ৰান্ত হোৱাৰ পিছতে জিলা প্ৰশাসনে সমগ্ৰ এলেকাটোক তাৎক্ষণিক ভাৱে বলৱৎ হোৱাকৈ কণ্টেইনমেণ্ট জ’ন ঘোষণা কৰিছে৷

ইতিমধ্যে এলেকাটো ছীল কৰিছে৷ বিশ্বনাথ জিলা দণ্ডাধীশে অসম কোৱিড-১৯ নিয়মাৱলী-২০২০ অনুসৰি জাৰি কৰা ৰ্নিদেশ অনুসৰি এই এলেকাৰ উত্তৰে শ্যাম ছেত্ৰীৰ বাসগৃহ, দক্ষিণে তেজ বাহাদুৰ কটোৱালৰ বাসগৃহ, পূব আৰু পশ্চিমে চন্দ্ৰভেটী গাঁৱৰ গাৱলীয়া পথক সীমা নিৰ্ধাৰণ কৰিছে। এই আদেশ ১১ জুনৰ পুৱা ১০ বজাৰ পৰা কাৰ্যকৰী হৈছে।

উল্লেখ্য যে, আদেশ অনুসৰি এই এলেকাত প্ৰশাসনৰ অনুমতি অবিহনে যিকোনো লোকৰ প্ৰৱেশ তথা প্ৰস্থান নিষিদ্ধ কৰাৰ লগতে কোনো লোকৰ আৰু যান-বাহনৰ চলাচল সম্পূৰ্ণৰূপে নিষিদ্ধ কৰা হৈছে। এই সময়ছোৱাত এলেকাত সামাজিক দূৰত্ব বজায় ৰখাৰ লগতে অনান্য কোৱিড-১৯ৰ নিয়ম সমূহ মানি চলাটো বাধ্যতামূলক কৰা হৈছে৷

ভাৰত চৰকাৰৰ স্বাস্থ্য আৰু পৰিয়াল কল্যাণ মন্ত্ৰালয়ৰ নিয়মাৱলীৰ আধাৰত এই এলেকা সুৰক্ষিত বুলি ঘোষণা নোহোৱা পৰ্যন্ত এই নিয়ম সমূহ বাহাল থাকিব৷
এই আদেশ উলংঘাকাৰীৰ বিৰুদ্ধে অসম কোৱিড-১৯ নিয়মাৱলী ২০২০, দুৰ্যোগ প্ৰশমন আইন ২০০৫, মহামাৰী প্ৰতিৰোধ আইন ১৮৯৭ৰ লগতে অনান্য আইনৰ অধীনত কাৰ্য ব্যৱস্থা গ্ৰহণ কৰা হ’ব।

বিশ্বনাথ জিলাৰ নদুৱাৰ ৰাজহ চক্ৰৰ অন্তৰ্গত চন্দ্ৰভেটী গাঁও নিবাসী কৃষ্ণ কটোৱাল নামৰ যুৱক জন বহিঃৰাজ্যৰ পৰা আহি প্ৰথমে কোৱাৰান্টাইন কেন্দ্ৰ থকে যজদিও যোৱা ৬ জুনত চন্দ্ৰভেটীৰ নিজা ঘৰত হোম কোৱাৰান্টাইন হৈ আছিল।