চতিয়াঃ ৰাজ্যৰ বাটপথৰ অৱস্থা উন্নত হোৱা বুলি দাবী কৰি থকাৰ সময়তে বিশ্বনাথ জিলাৰ চতিয়াত জৰাজীৰ্ণ দলঙে জ্বলা-কলা খুৱাইছে পথচাৰীক৷ দক্ষিণ চতিয়াৰ আদাভেটি-বকৰাপট্টা পথৰ দলং নথকাৰ বাবে ৰাইজে যমৰ-যাতনা ভোগ কৰি আহিছে৷ ৰাইজে নিজেই নিৰ্মাণ কৰি লোৱা এখন বাঁহৰ অস্থায়ী দলঙেৰে মৰণক-শৰণ কৰি যাতায়াত কৰি আহিছে৷ প্ৰতিদিনে কেইবা শতাধিক পথচাৰীয়ে বিপদ সংকুলভাৱে যাতায়াত কৰে৷

ভৰ ঘিলাধাৰী নৈৰ ওপৰত থকা এই দলংখন ৰাইজে গাঁঠিৰ ধন ভাঙি নিৰ্মাণ কৰিছে৷ দীৰ্ঘদিন ধৰি স্থানীয় ৰাইজে নৈ খনৰ ওপৰত এখন স্থায়ী দলং নিৰ্মাণৰ দাবী জনাই আহিছে যদিও বিধায়ক তথা জনপ্ৰতিনিধিয়ে ৰাইজৰ দাবীত গুৰুত্ব নিদিয়াৰ অভিযোগ উত্থাপন কৰে৷ বৃহত্তৰ বকৰাপট্টাকে আদি কৰি ৭-৮ খন গাঁৱৰ লগত চতিয়া-কৰৈয়নী পথৰ একমাত্ৰ যোগাযোগৰ সম্বল এই দলঙখন৷

অসম সংখ্যালঘু সংগ্ৰাম পৰিষদৰ বিশ্বনাথ জিলা সমিতিয়ে দলং খন নিৰ্মাণৰ বাবে বিভাগীয় কৰ্তৃপক্ষক দাবী জনাই অহাৰ পিছতো গুৰুত্ব নিদিয়াৰ অভিযোগ উত্থাপন হৈছে৷ নিৰ্বাচনৰ আগমুহূৰ্তত দলং নিৰ্মাণ নকৰিলে জনপ্ৰতিনিধিসকলৰ প্ৰবেশ নিষিদ্ধ কৰাৰ হুংকাৰ প্ৰদান কৰিছে সংখ্যালঘূ সংগ্ৰাম পৰিষদে।