দুধনৈঃ মুখ্যমন্ত্ৰী সৰ্বানন্দ সোণোৱালে দুৰ্নীতিৰ বিৰুদ্ধে শূন্য সহনশীল নীতি অৱলম্বন কৰাৰ কথা উল্লেখ কৰি অহাৰ সময়তে এতিয়া দিনৰ পোহৰতে চলিছে মুক্ত দুৰ্নীতি। ৰাজ্যত এতিয়া প্ৰতিটো বিভাগত মুকলি ভাৱে দুৰ্নীতি সংঘটিত হৈ অহাৰ বিভিন্ন সময়ত অভিযোগ উত্থাপন হৈ আহিছে।

শেহতীয়াকৈ গোৱালপাৰা জিলাৰ দামৰা গাঁও পঞ্চায়তত ব্যাপক দুৰ্নীতি সংঘটিত হোৱাৰ অভিযোগ উত্থাপন হৈছে৷ পঞ্চায়তত মুকলি ভাৱে কমিচনৰাজ চলিছে বুলি অভিযোগ উত্থাপন কৰিছে ৰাইজে৷

পঞ্চায়তখনত শেহতীয়াকৈ বিধৱা মহিলা হিতাধিকাৰীক চৰকাৰী সাহায্য প্ৰদানৰ নাত কমিচন লোৱাৰ অভিযোগ উত্থাপন কৰিছে খোদ এই আঁচনিৰ হিতাধিকাৰী কেইবাগৰাকী মহিলাই৷ পঞ্চায়ত সদস্যাৰ বিৰুদ্ধে কেমেৰাৰ সন্মুখতে আঁচনিৰ ধন দিয়াৰ নামত ২৫০০ টকাকৈ লোৱা বুলি অভিযোগ উত্থাপন কৰে বিধৱা মহিলাগৰাকীয়ে

দামৰা গাঁও পঞ্চায়তৰ ১০ নম্বৰ ৱাৰ্ডৰ সদস্যা ৰীণা দৈমাৰীয়ে বিধৱা মহিলা হিতাধিকাৰীক ২৫ হাজাৰ টকা এককালিন সাহায্য দিয়াৰ বিনিময়ত দহ গৰাকীকৈ অধিক বিধৱা মহিলাৰ পৰা ২,৫০০ টকাকৈ উৎকোচ লোৱাৰ অভিযোগ উত্থাপন হৈছে। প্ৰতিগৰাকী মহিলাৰ পৰা ২৫০০ টকাকৈ লোৱাৰ অভিযোগ উত্থাপন কৰি অভিযোগকাৰী মহিলাসকলে কয় যে সদস্যাগৰাকীক উৎকোচ নিদিলে আঁচনিৰ পৰা বঞ্চিত হ’ব বুলি কয়৷ আঁচনিৰ তালিকাৰ পাৰ নাম কৰ্তন কৰাৰ ভয় দেখুৱাই দৰিদ্ৰ মহিলাসকলৰ পৰা ২৫০০ টকাকৈ সংগ্ৰহ কৰে ৱাৰ্ডৰ সদস্যা ৰীণা দৈমাৰীয়ে৷

তদুপৰি ৰেচন কাৰ্ড নথকা দুখীয়া লোকক প্ৰদান কৰা এক হাজাৰ টকাৰ পৰাও দুশ টকাকৈ আত্মসাত কৰা বুলি গুৰুতৰ অভিযোগ উত্থাপন হৈছে ৱাৰ্ডৰ সদস্যা ৰীণা দৈমাৰীৰ বিৰুদ্ধে। এইক্ষেত্ৰত পঞ্চায়তৰ সচিব আৰু সভাপতি তথা ৰাজ্য চৰকাৰে সদস্যাগৰাকীৰ বিৰুদ্ধে কি ব্যৱস্থা গ্ৰহণ কৰে সেয়া লক্ষ্যনীয় হ’ব।