গোৱালপাৰাত বনৰীয়া হাতীৰ তাণ্ডৱ, লণ্ড-ভণ্ড কৰিলে ৪টা পৰিয়ালৰ ঘৰ-দুৱাৰ
- Update Time : Wednesday, July 8, 2020
- 232 Time View
দুধনৈঃ গোৱালপাৰাত বিগত কেইবাদিন ধৰি হাতী-মানুহৰ সংঘাত অব্যাহত আছে৷ সম্প্ৰতি এই সংঘাতে তীব্ৰ ৰূপ ধাৰণ কৰিছে৷ জিলাখনৰ ৰংজুলি, দুধনৈ, ধূপধৰা আদি অঞ্চলত নিশা বৃহৎ বৃহৎ বনৰীয়া হাতীৰ জাক খাদ্যৰ সন্ধানত বনাঞ্চলৰ পৰা জলাঞ্চললৈ ওলাই আহে৷ জনাঞ্চললৈ ওলাই আহি সন্ত্ৰাস চলাই মানুহৰ ঘৰ-দুৱাৰ লণ্ডভণ্ড কৰাৰ লগতে সা-সম্পত্তি বিনষ্ট কৰে৷
জানিব পৰা মতে, ৰংজুলি আঞ্চলিক বন বিভাগৰ অন্তৰ্গত কাহিবাৰী অঞ্চলত মঙলবাৰে নিশা এটা অকলশৰীয়া বন্যহস্তীয়ে ৪টা পৰিয়ালৰ বাসগৃহ লণ্ডভণ্ড কৰি সা-সম্পত্তি বিনষ্ট কৰে৷ এই ঘটনাৰ কিছু সময়ৰ পাছতেই স্থানীয় ৰাইজে জুই জ্বলাই, ফটকা ফুটাই হাতীটোক গাঁৱৰ পৰা খেদি পঠিয়াই৷
দুধনৈ সমষ্টিৰ বিধায়ক দীপক কুমাৰ ৰাভাই ঘটনাস্থলীত উপস্থিত হৈ ৪ ভুক্তভোগী পৰিয়ালক ঘৰ-দুৱাৰ মেৰামতি কৰিবলৈ আৰ্থিক সাহায্য প্ৰদান কৰে৷ সমান্তৰালভাৱে অতি সোনকালে পৰিয়ালটোৰ ক্ষতিপূৰণৰ ব্যৱস্থা গ্ৰহণ কৰিবলৈ বিভাগীয় কৰ্তৃপক্ষক নিৰ্দেশ দিয়ে বিধায়ক ৰাভাই৷
