স্কাই নিউজ আসাম, গুৱাহাটী ডেস্কঃ গুৱাহাটী মহানগৰত সৰ্বত্ৰ এতিয়া ক’ৰোনাৰ আতংক৷ ৰাজপথ উদং হৈ পৰাৰ লগতে খালি হৈ পৰিছে ভাড়াঘৰসমূহ৷ মহানগৰৰ অলিয়ে-গলিয়ে এতিয়া মানুহৰ ঘৰৰ সন্মুখত লাগি আছে ‘‘TOLET’ ফলক৷ দীৰ্ঘদিন ধৰি এই ফলকবোৰ ওলমি থকাৰ ফলত কিছুমান উৱলিও গৈছে৷ লগে লগে দেখা গৈছে দোকান ঘৰৰ সন্মুখত বন্ধ চাটাৰটো আৰ দিয়া আছে ‘TOLET’ ফলক৷

ঘৰ ভাড়া দি পৰিয়াল পোহপাল দিয়া মহানগৰৰ একাংশৰ বাসিন্দাৰ এতিয়া পানীত হাহ নচৰাৰ দৰে হৈছে৷ প্ৰায়সমূহ এলেকাতে ভড়াঘৰ এৰি গাঁৱলৈ গুছি গৈছে সৰু-সুৰা ব্যৱসায় কৰা, গাড়ী চলোৱা পৰিয়ালসমূহ৷ অটো, উবেৰৰ চালকসমূহো অনিৰ্দিষ্ট কালৰ বাবে গুৱাহাটী এৰি গুছি গৈছে৷ বিশেষকৈ চৰকাৰী ভাৱে এই যুঁজ দীঘলিয়া হ’ব, কিমান দিন লক-ডাউন দিব লাগিব তাৰ কোনো নিশ্চয়তা নাই, আদি ঘোষণা ৰাজ্য চৰকাৰৰ পৰা দি অহাৰ ফলতে মহানগৰবাসী অধিক আতংকিত হৈ পৰিছে৷

ইফালে কোৱিড-১৯ৰ সংক্ৰমণৰ আশংকাত বাতৰি কাকক পঢ়িবলেও এৰিছে মহানগৰবাসীয়ে৷ স্কাই নিউজৰ ফালৰ পৰা কেইবাজনো হকাৰক সাক্ষাৎ কৰি লাভ কৰা তথ্য অনুযায়ী মহানগৰত এতিয়া ৪০ শতাংশ বিক্ৰী নহয় বাতৰি কাকত৷ ফলশ্ৰুতিত হকাৰসমূহৰ জীৱনলৈ নামি আহিছে অনিশ্চয়তা৷ গুৱাহাটী সুৰযনগৰৰ সমীপৰ আনন্দনগৰৰ এটা গলিত আজি এজন হকাৰে জনোৱা মতে, পূৰ্বতে যিখন কাকত তেওঁ এশ কপি বিক্ৰী কৰিছিলে সেইখন কাকতৰ এতিয়া ৪০ কপিৰো গ্ৰাহক নাই৷ গ্ৰাহকে ভাইৰাছ নোহোৱা হলেহে পুনৰ কাকত লব বুলি হকাৰসকলক জনাই দিছে৷ অন্যহাতে বহু এলেকাত স্থানীয় সমিতিসমূহে বাতৰি কাকতৰ হকাৰ অহাটো নিষিদ্ধ কৰিছে৷