গুৱাহাটীঃ এতিয়াৰ পৰা পুৱা ৯ বজাৰ পৰিবৰ্তে পুৱা ৭ বজাত আৰু নিশা ৯বজাৰ পৰিবৰ্তে নিশা ৭ বজাৰ পৰা কাৰ্ফিউ আৰম্ভ হ’ব৷ এই কথা শুকুৰবাৰে ঘোষণা কৰিছে ৰাজ্যৰ স্বাস্থ্যমন্ত্ৰী ড০ হিমন্ত বিশ্ব শৰ্মাই৷ এই ঘোষণা দুদিনৰ বাবেহে৷ দুদিনৰ পিছত অৰ্থাৎ দেওবাৰৰ নিশাৰ পৰা ১৪ দিনৰ সম্পূৰ্ণ লক-ডাউন ঘোষণা কৰিছে গুৱাহাটী মহানগৰ৷ গুৱাহাটী মহানগৰীত প্ৰতিদিনে ক’ৰোনা আক্ৰান্ত ৰোগী দ্ৰুত গতিত বৃদ্ধি হোৱাৰ সময়তে ৰাজ্য চৰকাৰে গণ সংক্ৰমণৰ আশংকা কৰি পুনৰ লক-ডাউন ঘোষণা কৰিছে৷

শুকুৰবাৰে এখন সংবাদমেল অনুষ্ঠিত কৰি স্বাস্থ্য মন্ত্ৰী ড০ হিমন্ত বিশ্ব শৰ্মাই গুৱাহাটী মহানগৰীত অহা সোমবাৰৰ পৰা ১৪ দিনৰ বাবে লক-ডাউন বলৱৎ হ’ব বুলি ঘোষণা কৰে৷ দুসপ্তাহৰ এই লক-ডাউনৰ প্ৰথম ৭ দিন কঠোৰ হ’ব বুলি কয়। গুৱাহাটীত কোৱিড-১৯ত আক্ৰান্ত ৰোগীৰ সংখ্যা বৃদ্ধই পাবলৈ ধৰা বুলি কৈ মন্ত্ৰী হিমন্তই কয় যে গুৱাহাটী মহানগৰীত গণ সংক্ৰমণ হ’বলৈ আৰম্ভ কৰে। সেয়ে আমি এই সিদ্ধান্ত গ্ৰহণ কৰিবলৈ বাধ্য হৈছো।

উল্লেখ্য যে, মহানগৰীত সংক্ৰমণৰ সংখ্যা বৃদ্ধি পাবলৈ লোৱাত ১৫ জুনৰ পৰা ৰেণ্ডম টেষ্ট আৰম্ভ কৰিছিল ৰাজ্যৰ স্বাস্থ্য বিভাগে। ইয়াৰ পিছতে ১৫ জুনৰ পৰা আজিলৈকে মহানগৰীত ৭৬২ জন লোকৰ দেহত কৰ’না পজিটিভ ধৰা পৰে বুলি সংবাদমেলত জানিবলৈ দিয়ে মন্ত্ৰী শৰ্মাই। এই সময়ছোৱাত ১০ হাজাৰ ৬১৭ জন লোকৰ চেম্পল কালেকশ্যন কৰাৰ কথা জনাই মন্ত্ৰীগৰাকীয়ে।

গুৱাহাটী মহানগৰীত দ্ৰুত গতিত কৰ’নাৰ সংক্ৰমণ বৃদ্ধি হ’বলৈ আৰম্ভ কৰিছে। এইকেইদিনত ধৰা পৰা ৭৬২ জন লোকৰ অধিকাংশৰে ট্ৰেভেল হিষ্টৰী পোৱা হোৱা নাই। লাহে লাহে ৰেলৰ চলাচল এন এফ ৰেলৱেই বন্ধ কৰি দিছে। শ্ৰমিক-কৃষক এক্সপ্ৰেছো আৰু ৪খন মানহে আহিব। ফ্লাইটৰ সংখ্যাও কমি আহিছে। গতিকে মই ধাৰণা কৰিছো যে অহা এসপ্তাহমানত গুৱাহাটীৰ বাহিৰত সংক্ৰমণৰ সংখ্যা কমি যাব। কিন্তু গুৱাহাটী মহানগৰীত সংক্ৰমণৰ সংখ্যা উৰ্ধমুখী হোৱাৰ সম্ভাৱনা আছে বুলি কয় মন্ত্ৰীগৰাকীয়ে।

মন্ত্ৰীগৰাকীয়ে এইকেইদিন ৭৬২ জন লোক ধৰা পৰিছে। গতিকে চেম্পল দিয়াৰ পৰা আইছলেশ্যন কৰালৈকে যদি ৫-৬ দিনো সময়ৰ প্ৰয়োজন হৈছে বুলি আমি ধৰি লও তেন্তে এইকেইদিনত লোকসকল ঘূৰি থকাটোৱেই স্বাভাৱিক। লগতে কিবা এটা ছিনড্ৰম পোৱাৰ পিছতহে পৰীক্ষা কৰিবলৈ আহিছিল। সেয়ে এয়া অনস্বীকাৰ্য যে মহানগৰীত বহুখিনি লোকৰ মাজলৈ কোৱিড বিয়পি গৈছে।

মন্ত্ৰী হিমন্তই কয় যে পৰহি মই দিল্লীত আছিলো। মই দেখা পাইছিলো যে সকলো মানুহে মাস্ক ব্যৱহাৰ কৰি আছে। ৰাস্তা-ঘাটত প্ৰয়োজন হ’লে মানুহ ওলাই নাহে। কিন্তু আজি গুৱাহাটী মহানগৰীত দেখিছো যে কাৰ্যত ১০ শতাংশ লোকেও মাস্ক ব্যৱহাৰ কৰা নাই। ছ’চিয়েল ডিষ্টেন্সিং ৰখা নাই। গধূলি হ’লে ১০ জনৰো অধিক লোক লগ হৈ আড্ডা দিয়াও দেখিছো। হোটেল-ৰেষ্টুৰেণ্ট খুলি দিছো যাতে দূৰত্ব বৰ্তাই ৰাখি চাহ বা ভাত খাব পাৰে। পিছে সকলোৱে আগৰ দৰেই হৈ পৰিছে। চৰকাৰী কাৰ্যালয়সমূহতো মানুহৰ সংখ্যা বাঢ়িছে। হাইৱেবোৰত ট্ৰাকৰ লোডিং-আনলোডিং চলা ঠাইসমূহতো মানুহৰ অত্যাধিক জনসমাগমে পৰিৱেশ অধিক জটিল কৰি তুলিছে বুলি গুৱাহাটীবাসীৰ বিৰুদ্ধে ক্ষোভ উজাৰে হিমন্তই বিশ্ব শৰ্মাই৷ মহানগৰবাসী যে ক’ৰোনাক লৈ মুঠেই সচেতন হোৱা নাই বুলি কৈ দিল্লীৰ সৈতে তুলনা কৰে৷

মন্ত্ৰী হিমন্ত বিশ্ব শৰ্মাই গেলামালৰ দোকান খোলা নাথাকিব বুলি কয়৷ মহানগৰবাসীৰ এনে দায়িত্বহীনতাৰ বাবে অত্যন্ত অনিচ্ছা সত্বেও অহা সোমবাৰৰ পৰা ১৪ দিনৰ বাবে গুৱাহাটীত পুনৰ লক-ডাউন ঘোষণা কৰিবলৈ চৰকাৰ বাধ্য হৈছে বুলি আজিৰ সংবাদমেলত সদৰী কৰে স্বাস্থ্যমন্ত্ৰীগৰাকীয়ে। ১৪ দিনৰ বাবে গুৱাহাটী মহানগৰীত আমি লক-ডাউন বলৱৎ কৰাৰ সিদ্ধান্ত লৈছো। এই সিদ্ধান্তই বহু মানুহক দুখ-কষ্ট দিব, অৰ্থনৈতিকভাৱে ক্ষতিগ্ৰস্ত কৰিব। কিন্তু যেতিয়ালৈকে আমি আমাৰ দায়িত্ব পালন কৰিব নোৱাৰিম তেতিয়ালৈকে চৰকাৰে মানুহৰ জীৱন ৰক্ষাৰ বাবে চৰকাৰে কঠোৰ সিদ্ধান্ত ল’বলৈ বাধ্য। লকডাউনক বেদনাদায়ক হিচাপে অভিহিত কৰি আৰু আন-লকৰ পৰা লক-ডাউনলৈ যাবলগীয়া হোৱাটো দুৰ্ভাগ্যজনক বুলি উল্লেখ কৰি ১২ জুলাইলৈকে আনুষ্ঠানিকভাৱে কামৰূপ মহানগৰ জিলাত লকডাউন ঘোঘণা কৰে মন্ত্ৰীগৰাকীয়ে। লক-ডাউনৰ সময়ত গেলামাল দোকান পৰ্যন্ত বন্ধ থাকিব বুলি ঘোষণা কৰে মন্ত্ৰীগৰাকীয়ে৷