ছয়গাঁওঃ কামৰূপৰ ছয়গাঁও আৰক্ষীয়ে এক গোপন খবৰৰ ভিত্তিত ৰাজধানী গুৱাহাটীত অভিযান চলাই জালত পেলাবলৈ সক্ষম হৈছে ড্ৰাগছ ব্যৱসায়ীক৷ বৃহস্পতিবাৰে পুৱতি নিশা ছয়গাঁও আৰক্ষী থানাৰ সহকাৰী উপ-পৰিদৰ্শক গৌতম সিনহাৰ নেতৃত্বত এটা দলে গুৱাহাটীৰ ৰূপনগৰত অভিযান চলাই এঘৰ লোকৰ ঘৰৰ পৰা গ্ৰেপ্তাৰ কৰিবলৈ সক্ষম হয় মহিদুল ইছলাম নামৰ ড্ৰাগছ ব্যৱসায়ীজনক৷

জানিব পৰা মতে, ড্ৰাগছ ব্যৱসায়ীজনৰ ঘৰ গৰৈমাৰীৰ ঘোঁৰামাৰা পথাৰত৷ ছয়গাঁও আৰক্ষী থানাৰ ভাৰপ্ৰাপ্ত আৰক্ষী বিষয়া কপিল পাঠকে জানিবলৈ দিয়া মতে, দীৰ্ঘ দিন ধৰি আৰক্ষীৰ চকুত ধুলি দি অবাধে ব্যৱসায় চলাই গৈছিল মহিদুলে৷ ম’ষ্ট ৱাণ্টেড ড্ৰাগছ মাফিয়া ৰূপে অভিহিত মহিদুলক গ্ৰেপ্তাৰৰ বাবে আৰক্ষীয়ে কেইবাবাৰো অভিযান চলাইছিল যদিও পলাই সাৰিবলৈ সক্ষম হৈছিল৷ অৱশেষত ড্ৰাগছ মাফিয়া মহিদুল গুৱাহাটীত আত্মগোপন কৰি থকাৰ খবৰ লাভ কৰে আৰু ছয়গাঁও আৰক্ষীয়ে আটক কৰিবলৈ সক্ষম হয়৷

উল্লেখ্য যে, ইতিমধ্যে ছয়গাঁও আৰক্ষীয়ে কিছুদিন পূৰ্বে গৰৈমাৰী অঞ্চলৰ পৰা ড্ৰাগছৰ ব্যৱসায়ত জড়িত থকাৰ অভিযোগত কেইবাজনো লোকক গ্ৰেপ্তাৰ কৰি জেল হাজোতলৈ প্ৰেৰণ কৰিছে৷ ছয়গাঁও থানাত ৪৫৬/২০২০ আৰু ৫৫৬/২০২০ নম্বৰত ৰুজু হোৱা গোচৰৰ ভিত্তিত মহিদুলক গ্ৰেপ্তাৰ কৰি আৰক্ষীয়ে সোধা-পোচ অব্যাহত ৰাখিছে বুলি জানিব পৰা গৈছে৷