ডিজিটেল ডেস্কঃ ২৯ জুনৰ পৰা গুৱাহাটী মহানগৰীত চলি আছে লকডাউন। কিন্তু কাইলৈৰ পৰা ১২ জুলাইলৈকে গুৱাহাটীত কিছু ক্ষেত্ৰত শিথিল হ’ব লকডাউন। এই সম্পৰ্কত ৰাজ্যৰ মুখ্য সচিব কুমাৰ সঞ্জয় কৃষ্ণই প্ৰকাশ কৰিছে এখন নিৰ্দেশনা। এই নিৰ্দেশনা অনুসৰি সোমবাৰ আৰু বুধবাৰে এতিয়াৰে পৰা গুৱাহাটীত গেলামালৰ দোকান খুলিব পাৰিব। পুৱা ১১ বজাৰ পৰা বিয়লি ৪ বজালৈকে খুলিব পাৰিব দোকান। অৱশ্যে কেৱল ২০ শতাংশ দোকানহে খোলাৰ বাবে অনুমতি দিয়া হ’ব। এই সম্পৰ্কত জিলা উপায়ুক্তই নীতি নিয়ম নিৰ্ধাৰণ কৰি দিব। দোকানী আৰু গ্ৰাহকে মাস্ক পিন্ধিব লাগিব। লগতে সামাজিক দূৰত্ব ৰক্ষা কৰাৰ লগতে মূল্যবৃদ্ধি নকৰাকৈ সামগ্ৰী বিক্ৰী কৰাত গুৰুত্ব দিব লাগিব দোকানীসকলে।

ইয়াৰ সমান্তৰালকৈ পাইকাৰী দোকানসমূহ কেৱল দেওবাৰ আৰু মঙলবাৰেহে দোকান খুলিব পাৰিব। দোকান খোলাৰ বাবে বিয়লি ৩ বজাৰ পৰা ৬ বজালৈকে সময় নিৰ্ধাৰণ কৰা হৈছে। এফচিআইৰ কামসমূহো সঠিক মতে চলাব পাৰিব। অৱশ্যে সকলো ক্ষেত্ৰতে থাকিব লাগিব সামাজিক দূৰত্ব। তদুপৰি সোমবাৰ আৰু বুধবাৰে সামগ্ৰী বিক্ৰেতাসকলে গ্ৰাহকৰ ঘৰত গৈ পাচলি আৰু ফলমূল বিক্ৰী কৰিব পাৰিব। অৱশ্যে পুৱা ৮ বজাৰ পৰা বিয়লি ২ বজালৈকেহে বিক্ৰী কৰাৰ বাবে নীতি নিয়ম নিৰ্ধাৰণ কৰি দিয়া হৈছে। সোমবাৰ আৰু বুধবাৰে পুৱা ১০ বজাৰ পৰা বিয়লি ৩ বজালৈকে ঔষধ বা চিকিৎসা সামগ্ৰী পাইকাৰী বিক্ৰী কৰাৰ বাবে অনুমতি দিয়া হৈছে। ১০ জুলাইত পুৱা ১১ বজাৰ পৰা বিয়লি ৪ বজালৈকে ই কমাৰ্চ ব্যৱস্থাও খোলা থাকিব বুলি নিৰ্দেশনাটোত কোৱা হৈছে।