শিৱসাগৰঃ গীত কামৰূপা নাম এগৰাকী মহিলাৰ মন্তব্যৰ বিৰুদ্ধে জাঙুৰ খাই উঠিছে শিৱসাগৰবাসী৷ শিৱসাগৰ জিলাত ৬ হাজাৰ পঞ্জীয়নবিহীন দেহোপজিৱিনী থকাৰ লগতে প্ৰায় ১৫০০ পঞ্জীয়ন ভুক্ত দেহোপজিৱিনী থকা বুলি ভয়ংকৰ অভিযোগ উত্থাপন কৰিছিল গীত কামৰূপ নাম মহিলাগৰাকীয়ে৷
শিৱসাগৰ জিলাত ভয়ংকৰ ৰূপত দেহ ব্যৱসায় বৃদ্ধি পোৱাৰ লগতে একাংশ জাতীয় সংগঠনৰ পৃষ্ঠপোষকতাত এই ব্যৱসায় চলা বুলি অভিযোগ উত্থাপন কৰিছিল গীত কামৰূপে৷

তাৰ পিছতে শিৱসাগৰবাসী তথা জাতীয় সংগঠনসমূহ জাঙুৰ খাই উঠিছে৷ এখন জিলাৰ বাসিন্দাৰ বিৰুদ্ধে এনে অভিযোগ উত্থাপন কৰাৰ পিছতে জাতীয় সংগঠনসূহে উভতি ধৰিছে মহিলাগৰাকীক৷ এটাৰ পিছত আন এটা জাতীয় সংগঠনে উভতি ধৰাৰ সময়তে জিলা উপায়ুক্তই তদন্ত ঘোষণা কৰিছে৷ মহিলা শক্তি সংবৰ্ধন ক্ষেত্ৰ অসমৰ অধ্যক্ষা গীত কামৰূপাৰ বিতৰ্কিত বক্তব্য সন্দৰ্ভত তদন্ত ঘোষণা কৰিছে শিৱসাগৰ জিলাৰ উপায়ুক্ত লক্ষ্মীনন্দন গগৈয়ে৷ সাংবাদিকৰ সৈতে হোৱা কথা-বতৰাত এই কথা ঘোষণা কৰে উপায়ুক্তগৰাকীয়ে৷ বিষয়টো সন্দৰ্ভত তদন্ত কৰিব জিলাখনৰ অতিৰিক্ত উপায়ুক্ত কবিতা কোঁৱৰ কাকতিয়ে৷

সাংবাদিকে সোধা এক প্ৰশ্নৰ উত্তৰত শিৱসাগৰ জিলাৰ উপায়ুক্ত লক্ষ্মীনন্দন গগৈয়ে কয় যে এই সম্পৰ্কে তেওঁৰ ওচৰত কোনো তথ্য নাই আৰু এইসমূহ তথ্য গীত কামৰূপাই কৰ পৰা সংগ্ৰহ কৰিলে সেই সম্পৰ্কে তেওঁ অজ্ঞাত৷ বিষয়টো সন্দৰ্ভত তদন্ত কৰিবলৈ তেওঁ এগৰাকী অতিৰিক্ত উপায়ুক্তক দায়িত্ব দিয়াৰ কথা উল্লেখ কৰি প্ৰয়োজনত গীত কামৰূপাৰ বিৰুদ্ধে আইনগত ব্যৱস্থা গ্ৰহণ কৰা হ’ব বুলি স্পষ্ট কৰে৷ ইফালে গীত কামৰূপাৰ বিতৰ্কিত মন্তব্যত জাঙুৰ খাই উঠিছে প্ৰতিটো দল-সংগঠন৷ উজনি অসমৰ অন্যতম প্ৰভাৱশালী জনগোষ্ঠীয় সংগঠন আটাছুৱে বিতৰ্কিত মহিলাগৰাকীৰ বিৰুদ্ধে আইনগত ব্যৱস্থা হাতত লব বুলি স্পষ্ট কৰি দিছে৷

সংগ্ৰামী মঞ্চ অসমে বিতৰ্কিতা মহিলাগৰাকীৰ বক্তব্যত তীব্ৰ প্ৰতিক্ৰিয়া প্ৰকাশ কৰি মহিলাগৰাকীৰ বক্তব্যৰ সত্যতা প্ৰমাণ কৰিবলৈ প্ৰত্যাহ্বান জনাইছে৷ অসম ছাত্ৰ-যুৱ সন্মিলনে বিতৰ্কিতা মহিলাগৰাকীৰ বিৰুদ্ধে আইনগত ব্যৱস্থা গ্ৰহণ কৰা হ’ব বুলি স্পষ্ট কৰি দিছে৷ ঐক্য সেনা অসমে মহিলাগৰাকীৰ বক্তব্যৰ তীব্ৰ বিৰোধিতা কৰিছে৷ কোনো স্বাৰ্থান্বেষীৰ প্ৰৰোচনাত পৰি বিতৰ্কিতা মহিলাগৰাকীয়ে এইদৰে আবোল-তাবোল বকিছে বুলি উল্লেখ কৰিছে৷ উজনি অসম মুছলিম কল্যাণ পৰিষদে গীত কামৰূপাৰ বক্তব্যৰ প্ৰতিবাদ জনাইছে৷ বিশিষ্ট নিবন্ধকাৰ চামচুল বাৰিকে গীত কামৰূপাৰ বক্তব্যৰ তীব্ৰ বিৰোধিতা কৰিছে৷ নতুন প্ৰজন্মৰ এগৰাকী সম্ভাৱনাপূৰ্ণ লেখিকা উৰ্বশী মহন্তই বিতৰ্কিত মহিলাগৰাকীৰ তীব্ৰ বিৰোধিতা কৰি সস্তীয়া কথাৰে লাইমলাইটত থাকিব বিচৰা বুলি কয়৷