ডিজিটেল ডেস্কঃ ক’ৰোনা আক্ৰান্তৰ তালিকাত প্ৰথমস্থানত আছে শক্তিশালী আমেৰিকা। আমেৰিকাত এই পৰ্যন্ত ১৯ লাখ ৮৮ হাজাৰ লোক ক’ৰোনাত আক্ৰান্ত হৈছে। আমেৰিকাত ১ লাখ ১২ হাজাৰ লোকৰ মৃত্যু হৈছে। তালিকাৰ দ্বিতীয়স্থানত আছে ব্ৰাজিল। ব্ৰাজিলত এই পৰ্যন্ত ৬ লাখ ৭৬ হাজাৰ লোক আক্ৰান্ত হৈছে আৰু মৃত্যু হৈছে ৩৬ হাজাৰ লোকৰ। তৃতীয়স্থানত আছে ৰাছিয়া। ৰাছিয়াত এই পৰ্যন্ত ৪ লাখ ৬৭ হাজাৰ লোক আক্ৰান্ত হৈছে আৰু ৫,৫৮৯গৰাকী লোকৰ মৃত্যু হৈছে। চতুৰ্থস্থানত আছে স্পেইন। স্পেইনত এই পৰ্যন্ত ২ লাখ ৮৮ হাজাৰ লোক আক্ৰান্ত হৈছে আৰু মৃত্যুমুখত পৰিছে ২৭ হাজাৰ লোক। পঞ্চমস্থানত আছে ব্ৰিটেইন। ব্ৰিটেইনত এই পৰ্যন্ত ২ লাখ ৮৮ হাজাৰ লোক আক্ৰান্ত হৈছে আৰু ৪০ হাজাৰ লোকৰ মৃত্যু হৈছে। সুখৰ খবৰ এই যে স্পেইন আৰু ব্ৰিটেইনত যোৱা কেইবাটাও ঘণ্টাত এগৰাকীও নতুন ৰোগী ধৰা পৰা নাই।

ওপৰত উল্লেখিত দেশসমূহত দ্ৰুত গতিত ৰোগী ধৰা পৰাৰ সময়ত ভাৰতে সম্পূৰ্ণ লক-ডাউন পালন কৰি আছিল আৰু ৰোগীৰ সংখ্যা একেবাৰে নগণ্য আছিল। কিন্তু এই দেশসমূহত নতুন ৰোগীৰ সংখ্যা কমি অহাৰ সময়তে ভাৰতত ৰোগীৰ সংখ্যা দ্ৰুত গতিত বৃদ্ধি হৈছে। ভাৰতত লক-ডাউন শিথিল কৰাৰ সময়তে ৰোগীৰ সংখ্যা বৃদ্ধি হৈছে। ইখন ৰাজ্যৰ পৰা সিখন ৰাজ্যলৈ নাগৰিকে যাব ধৰাৰ সময়তে ৰোগীৰ সংখ্যা বৃদ্ধি হৈছে। ইপিনে বহিঃৰাষ্ট্ৰৰ পৰাও বিমান যোগে নাগৰিক আহিব ধৰিছে। যাৰ ফলত ৰোগীৰ সংখ্যা বৃদ্ধি হোৱা বুলি অনুমান কৰিব পাৰি।

ভাৰত ক’ৰোনা আক্ৰান্ত ৰোগীৰ সংখ্যাৰ দিশত বিশ্বৰ ভিতৰত ষষ্ঠস্থানত আছে। ব্ৰিটেইনৰ পিছতে আছে ভাৰত। কেইহাজাৰ মান ৰোগী যদি বৃদ্ধি হয় তেন্তে ভাৰত পঞ্চমস্থানত পাব। ক্ষতিগ্ৰস্তৰ তালিকাৰ অন্যতম ইটালীক সংখ্যাৰ বলেৰে পিছ পেলাইছে ভাৰতে।

ক’ৰোনাকালত অধিক ক্ষতিগ্ৰস্ত আন এখন দেশ স্পেইনত এই পৰ্যন্ত মুঠ আক্ৰান্ত সংখ্যা হৈছে ২ লাখ ৮৮ হাজাৰ। ভাৰতত এই পৰ্যন্ত আক্ৰান্ত হৈছে ২ লাখ ৪৭ হাজাৰ লোক। ক’ৰোনা প্ৰাৰ্দুৰ্ভাৱৰ হোৱাৰ সময়তে অধিক ক্ষতিগ্ৰস্ত দেশসমূহত ক’ৰোনা ৰোগী কমকৈ পাবলৈ ধৰাৰ বিপৰীতে ভাৰতত এই সময়ত ৰোগীৰ সংখ্যা বৃদ্ধি হৈছে।

উল্লেখ্য যে, কেন্দ্ৰীয় চৰকাৰে ব্যাপক হাৰত ক’ৰোনাৰ প্ৰকোপ নিয়ন্ত্ৰণ কৰিবলৈ ব্যপক ব্যৱস্থা গঢ়ি তুলিছে। কেন্দ্ৰীয় চৰকাৰে ৰাজ্য চৰকাৰৰ সমূহৰ সৈতে লগলাগি প্ৰকোপ ৰোধ কৰাৰ লগতে মানুহৰ জীৱন ৰক্ষা কৰিবৰ বাবে ব্যৱস্থা গ্ৰহণ কৰিছে। ভাৰতৰ কেন্দ্ৰীয় স্বাস্থ্য বিভাগৰ আজি প্ৰকাশিত তথ্য মতে, ক’ৰোনা ৰোগীৰ মুঠ সংখ্যা হৈছে ২,৪৬,৬২৮। ভাইৰাছত আক্ৰান্ত হৈ এই পৰ্যন্ত ৬,৯২৯গৰাকী লোকৰ মৃত্যু হৈছে।

বিগত ২৪ ঘণ্টাত নতুনকৈ ৯,৯৭১গৰাকী লোক ধৰা পৰিছে। বিগত ২৪ ঘণ্টাত ২৮৭গৰাকী লোকৰ মৃত্যু হৈছে। কিন্তু ভাল খবৰ এই যে দেওবাৰ তথা আজিলৈ ১,১৯,২৯৩গৰাকী লোক সুস্থ হৈ হস্পিতাল এৰিছে।